Gündəm,Türk Dünyası

"Şuşa Bəyannaməsi"nə bənzər sənədlər digər türk dövlətləri ilə də imzalana bilər - Rusiya nədən narahatdır?

2021-ci ildə Azərbayan Prezidenti İlham Əliyevlə türkiyəli həmkarı Rəcəb Tayyib Ərdoğan arasında imzalanan “Şuşa Bəyannaməsi” ilə Cənubi Qafqazda tamamilə yeni mərhələ başlandı. Bakı və Ankaranın bu həmləsi qardaşlığın ən bariz nümunəsi kimi qiymətləndirilməlidir. Belə ki, sözügedən bəyannamə ilə Azərbaycan və Türkiyə bir – birilərinin yanında olacaqlarını növbəti dəfə təsdiqlədilər və dünyaya nümayiş etdirdilər.

Bu gün həmin bəyannamənin imzalanmasından beş il keçir.

Türkiyəli politoloq, professor Hüsametdin İnaç sözügedən sənədin əhəmiyyəti barədə Crossmedia.az-a danışıb: ““Şuşa bəyannaməsi” rəhmətlik Ümummilli Lider Heydər Əliyevin “iki dövlət, bir millət” şüarının təzahürü kimi qiymətləndirilə bilər. Bu sənəd həm də bütün türk dünyası üçün nümunə ola biləcək sənəddir. Bu bəyannamə dostlarımıza güvən, düşmənlərimizə qorxu verib. Çünki sənəd iki dövlətin formalaşdırdığı geosiyasi vəhdətin göstəricidir. İkinci Qarabağ müharibəsinin nəticələri özünü göstərəndən sonra dünya dövlətləri bu anlaşmanın əhəmiyyətini daha yaxşı dərk etməyə başladılar. Bu sənəd həm də Türk dünyasını gücləndirdi. Son dövrdə bu razılaşmanın ruhunun türk dövlətlərinə siraətinin qarşısını alan əngəlləri görürük. Bunun başında Avropa İttifaqının (Aİ) siyasəti dayanır. Belə ki, Aİ son vaxtlar Azərbaycan istisna olmaqla digər türk dövlətlərini yunan Kiprini tanımağa və Türkiyəni işğalçı kimi xarakterizə etməyə məcbur edir. Həmçinin Qazaxıstanın İsraillə münasibətləri normalaşdırması istiqamətində addımları da bizi narahat edir. Rusiya da həm türk dünyasının güclənməsindən, həm də Azərbaycan- Türkiyə - Ermənistan xəttində münasibətlərin normallaşmasından narahatdır. Kremlin sözçüsü Dmitri Peskov və digər rəsmilər açıq- aydın bildirirlər ki, Ukraynada baş verənlər Cənubi Qafqazda- Ermənistanda da təkrarlana bilər”.

O bildirib ki, Şuşa Bəyannaməsinə bənzər sənədlərin digər Türk dövlətələri arasında imzalana bilər: “Çünki xüsusilə ABŞ İsrail tandemi ilə İran arasında müharibədən sonra rəsmi Ankaranın regiondakı rolu daha da artıb. Türkiyə indi qlobal təsirləri olan regional ölkədir. Bu baxımdan digər türk dövlətləri ilə də bənzər sənədlər imzalana bilər. Amma gərək həmin dövlətlər siyasi iradə ortaya qoysunlar, kənar güclərin prosesə müdaxiləsinin qarşısını alsınlar. Türk dövlətləri qlobal müstəvidə baş verən hadisələr qarşısında soyuqqanlı və təmkinli olmalıdırlar. Əks halda Türk dövlətlərinin güclənməsinin qarşısının alınması üçün bütün ehtimallar ortaya atıla bilər”.

🖨 Çap et

13:06 15.06.2026

Oxunuş sayı: 50