Sönməz alov: Şəhid mayor Vüsal Vəliyevin qəhrəmanlıq yolu
Şərur rayonunun füsunkar təbiəti, qoca çinarların kölgəsində, 1988-ci ilin isti iyul günlərində doğulan Vüsal Vəliyevi qucağına alır. Dizə kəndinin sakit yollarında, oynayan bu balaca oğlanın gözlərində, gələcəyin parıltısı vardı. Hər səhər açılan günəşin ilk işıqları, onun böyük ürəyində vətən eşqini alovlandırırdı.
Vüsal, 1994-cü ildə Dizə kənd orta məktəbində təhsil alarkən, fədakar bir insanın ilk qığılcımlarını ətrafdakılara hiss etdirirdi. Hələ məktəb yaşlarında hərbi həyatın sirlərinə maraq göstərirdi.
Gənclik illərində Heydər Əliyev adına Hərbi Liseyə qəbul olan Vüsal, burada öz vətəninə xidmət etmək üçün ilk addımlarını atdı. Ali Hərbi Məktəb və Xüsusi Təyinatlı Qüvvələrdə aldığı təlimlər, onu peşəkar bir zabit etdi.
Mayor rütbəsinə qədər yüksələn Vüsal Beyləqan, Füzuli, Ağdam, Tərtər, Tovuz, Qazax və Göygöl-Murovdağda göstərdiyi şücaət və cəsarəti ilə hər zaman ön planda idi. Onun qəlbi, vətən sevgisi ilə dolub daşırdı və bu sevgi ona “Azərbaycan Respublikası Silahlı Qüvvələrinin 95 illiyi (1928-2013) Yubiley Medalı” , “Azərbaycan Ordusunun 100 illiyi (1918-2018) Yubiley Medalı”, “ 10 il Qüsursuz xidmətlərə görə” 3-cü dərəcəli medalı, Azərbaycan Respublikası Müdafiə Naziri General-Polkovnik Zakir Həsənov tərəfindən təqdim edilmiş xüsusi medalla təltif olunub.
2020-ci ilin sentyabrın 27-də başlayan Vətən müharibəsi, Vüsal üçün taleyin sınağı və şərəfin zirvəsi oldu. Murovdağdan başlayan bu döyüş yolu, Şuşanın azadlığı uğrunda mübarizə ilə sona çatdı. Hər bir addımda, Vüsalın igidliyi və əzmkarlığı vətənin torpağında əbədi izlər qoyurdu.
9 noyabr 2020-ci ildə, Şuşanın qurtuluşu üçün canını fəda edən Vüsal, şəhidlik zirvəsinə ucaldı. Vüsalın adı tarixə qızıl hərflərlə yazıldı. Onun qanı ilə sulanan bu torpaq, vətənin azadlığı və şərəfi üçün ödənilən ən böyük qurban oldu.
Vüsalın əziz xatirəsi, "Şəhid Vüsal bulağı" abidə-bulaq kompleksi ilə əbədiləşdirildi. Onun haqqında yazılan kitablar və çəkilən sujetlər, onun qəhrəmanlıq dastanını geniş kütlələrə çatdırdı. Vüsalın igidliyini unutmaq mümkün deyil.
Cabbarlı adına İrəvan Dövlət Azərbaycan Dram Teatrında səhnələşdirilən Adilə Nəzərinin "Axirətdən gələn səs" pyesi əsasında səhnələşdirilən "Səs" qəhrəmanlıq dramı, Vüsalın ölməz ruhunu yenidən canlandırdı, tamaşaçılarının qəlbində əbədi bir iz buraxdı. Bu dram, yalnız bir teatr tamaşası deyil, həm də bir qəhrəmanın hekayəsini danışan, onun igidliyini xatırladan bir rəsmdir. Hər səhnəsində Vüsalın cəsarəti və vətən sevgisi əks olunur, izləyicilər onunla birlikdə mübarizə aparır, onunla birlikdə yaşayır.
Vüsalın doğulduğu Dizə kəndindəki ata evi, artıq yalnız bir ev deyil. O, Vüsalın qəhrəmanlıq yolunun hər addımını əbədi olaraq yaşadan, ziyarətçilərinə onun həyatını və mübarizəsini anladan bir muzeyə çevrilib. Bu muzey, Vüsalın xatirəsini yaşatmaqla yanaşı, gələcək nəsillərə onun qəhrəmanlıq hekayəsini ilham mənbəyi olaraq təqdim edir.
N saylı hərbi hissədə şəhid mayor Vüsal Vəliyevin adına verilən post isə, onun adının və şücaətinin unudulmaz bir simvolu olaraq qalır. Hərbi hissədə xidmət edən əsgərlər, hər gün bu posta yanaşarkən Vüsalın ruhunun yanında olduqlarını hiss edir, onun igidliyindən ilham alırlar.
Vüsalın yoxluğunu qəbul etmək çətindir, amma onun igidliyi və fədakarlığı ürəklərdə əbədi olaraq yaşayacaq. Hər dəfə onun adını anarkən, qəlblərdə bir qürur hissi doğur, gözlərdə yaşlar bərq vurur. Onun qəhrəmanlıq hekayəsi, hər birimizə vətənə olan sevgimizin nə qədər dərin olduğunu xatırladır.
Samirə Şərif
07:19 19.12.2024
Oxunuş sayı: 31102
