Azərbaycan istehsalçıları üçün yeni bazar: 1,4 milyardlıq Çin
Azərbaycan son illərdə həyata keçirilən iqtisadi şaxələndirmə siyasəti çərçivəsində qeyri-neft ixracının artırılmasını və yeni bazarlara çıxışın genişləndirilməsini əsas prioritet istiqamətlərdən biri kimi müəyyənləşdirib. Bu kontekstdə dünyanın ən böyük istehlak bazarlarından biri olan Çin Xalq Respublikası Azərbaycan üçün həm strateji tərəfdaş, həm də kənd təsərrüfatı və qida məhsulları üzrə mühüm ixrac potensialına malik perspektivli bazar hesab olunur.
İki ölkə arasında iqtisadi əməkdaşlığın genişlənməsi fonunda Azərbaycan məhsullarının Çin bazarında mövqeyinin gücləndirilməsi, logistika imkanlarının inkişafı, keyfiyyət standartlarına uyğunluq və rəqabət qabiliyyətinin artırılması kimi məsələlər xüsusi aktuallıq qazanır.
İqtisadçı ekspert Famil Niftiyev Crossmedia.az-a mövzu ilə bağlı açıqlamasında bildirib ki, Çin əhalisinin 1,4 milyardı keçməsi, orta təbəqənin sürətlə genişlənməsi və keyfiyyətli qida məhsullarına artan tələbat Azərbaycan istehsalçıları üçün yeni imkanlar yaradır.
Ekspertin sözlərinə görə, Azərbaycanın təbii və iqlim üstünlükləri ölkənin kənd təsərrüfatı məhsullarının beynəlxalq bazarlarda rəqabət qabiliyyətini artırır: “Azərbaycanda istehsal olunan nar, fındıq, xurma, üzüm, çay, bal, meyvə şirələri və digər kənd təsərrüfatı məhsulları yüksək keyfiyyət göstəricilərinə malikdir. Xüsusilə ekoloji təmiz və təbii məhsullara üstünlük verən Çin istehlakçıları üçün bu məhsullar cəlbedici ola bilər. Son illər Azərbaycan narı və fındığının beynəlxalq sərgilərdə tanıdılması Çin bazarında marağın artmasına səbəb olub”.
Famil Niftiyev qeyd edib ki, Azərbaycanın əlverişli coğrafi mövqeyi də ixrac imkanlarını genişləndirən mühüm amillərdəndir: “Azərbaycan Avropa ilə Asiyanı birləşdirən mühüm nəqliyyat qovşağında yerləşir və ‘Bir Kəmər, Bir Yol’ təşəbbüsünün iştirakçılarındandır. Bakı–Tbilisi–Qars dəmir yolu, Bakı Beynəlxalq Dəniz Ticarət Limanı və Orta Dəhliz marşrutu vasitəsilə Çinlə yükdaşımaların həyata keçirilməsi logistika baxımından əlavə üstünlüklər yaradır. Bu marşrutlar məhsulların daha qısa müddətdə və daha münasib xərclərlə çatdırılmasına imkan verir”.
Bununla yanaşı, ekspert Çin bazarına çıxışın müəyyən çağırışlarla müşayiət olunduğunu da vurğulayıb. Onun sözlərinə görə, əsas problemlərdən biri yüksək rəqabət mühitidir: “Çin bazarında dünyanın müxtəlif ölkələrindən gətirilən kənd təsərrüfatı məhsulları geniş şəkildə təmsil olunur. Azərbaycan istehsalçıları həm qiymət, həm də keyfiyyət baxımından Türkiyə, İran, Özbəkistan, Çili və Avstraliya kimi ölkələrin məhsulları ilə rəqabət aparmalı olurlar”.
Ekspert həmçinin Çin bazarında tətbiq edilən ciddi keyfiyyət və sertifikatlaşdırma tələblərinə diqqət çəkib: “Qida təhlükəsizliyi, fitosanitar normalar və məhsulun izlənilməsi ilə bağlı standartlar kifayət qədər sərtdir. Azərbaycan istehsalçılarının beynəlxalq sertifikatlar əldə etməsi və məhsul keyfiyyətini davamlı şəkildə qoruması vacib şərtdir. Xüsusilə kiçik və orta sahibkarlar üçün bu proses əlavə maliyyə yükü yarada bilər”.
Famil Niftiyev logistika və nəqliyyat xərclərinin də ixracın inkişafına təsir edən amillərdən olduğunu bildirib: “Bəzi məhsulların daşınması zamanı vaxt və xərc amili onların rəqabət qabiliyyətinə təsir göstərir. Xüsusilə tez xarab olan məhsullar üçün soyuducu logistika sistemlərinin inkişaf etdirilməsi mühüm əhəmiyyət daşıyır”.
Ekspert hesab edir ki, Çin bazarında mövqelərin gücləndirilməsi üçün marketinq fəaliyyətləri daha da genişləndirilməlidir: “Çində keçirilən beynəlxalq sərgilərdə, ticarət forumlarında və qida festivallarında iştirakın artırılması Azərbaycan məhsullarının tanınmasına müsbət təsir göstərə bilər. Eyni zamanda milli brendin formalaşdırılması və məhsulların mənşə üstünlüklərinin ön plana çıxarılması vacibdir”.
Onun fikrincə, dövlət dəstəyi mexanizmlərinin gücləndirilməsi və istehsalçıların beynəlxalq sertifikatlaşdırma proseslərinə cəlb olunması da mühüm əhəmiyyət kəsb edir. Kənd təsərrüfatında müasir texnologiyaların tətbiqi, məhsuldarlığın artırılması və keyfiyyətə nəzarət sistemlərinin təkmilləşdirilməsi ixrac imkanlarını daha da genişləndirə bilər.
Ekspert elektron ticarətin imkanlarından istifadənin də vacibliyini qeyd edib: “Çin dünyada elektron ticarətin ən inkişaf etmiş bazarlarından biridir. Azərbaycan şirkətlərinin bu platformalarda fəal iştirakı məhsulların daha geniş istehlakçı auditoriyasına çatdırılmasına şərait yarada bilər”.
Famil Niftiyev vurğulayıb ki, Çin bazarı Azərbaycan kənd təsərrüfatı və qida məhsulları üçün böyük potensiala malikdir. Onun sözlərinə görə, düzgün strategiya, dövlət və özəl sektorun koordinasiyalı fəaliyyəti, eləcə də uzunmüddətli yanaşma nəticəsində Azərbaycan Çin bazarında mövqeyini gücləndirə və qeyri-neft ixracının həcmini əhəmiyyətli dərəcədə artıra bilər.
Nigar Xəlilli
14:50 10.06.2026
Oxunuş sayı: 59
