Mərkəzi Elmi Kitabxananın fəaliyyət istiqamətləri nəzərdən keçirilib
Azərbaycan Milli Elmlər Akademiyasının (AMEA) Mərkəzi Elmi Kitabxanasının (MEK) Elmi-Metodiki Şurasının cari il üzrə ikinci iclası baş tutub.
Crossmedia.az xəbər verir ki, iclası şuranın sədri, MEK-in direktoru texnika elmləri doktoru Hüseyn Hüseynov açaraq gündəlikdə yer alan məsələləri iştirakçıların diqqətinə çatdırıb.
Direktor, MEK-in təşkilatçılığı ilə Ümummilli Lider Heydər Əliyevin anadan olmasının 103 illiyinə həsr olunmuş “Kitabxanaşünaslığın aktual problemləri” mövzusunda II respublika elmi konfransının nəticələri barədə məlumat verib. Konfransın kitabxanaşünaslıq sahəsində yeni yanaşmaların formalaşmasına mühüm töhfə verdiyini vurğulayıb.
H.Hüseynov, Türkiyədə keçirilən III Beynəlxalq Kitabxana və Texnologiya Festivalında iştirak zamanı AMEA-nın korporativ rəqəmsal kitabxana sisteminin qurulmasına texniki dəstək istiqamətində ilkin razılıqların əldə olunduğunu qeyd edib.
Bundan əlavə, direktor Şimali Kipr Türk Respublikasında keçirilən III “Yerli Qlobal Əməkdaşlıq Görüşləri”ndə iştirakı haqqında danışıb. Bildirilib ki, forumda kitabxanalarda süni intellektin axtarış sistemlərinə tətbiqi, eləcə də Türkiyə verilənlər bazasının türkdilli ölkələr üçün daha əlçatan edilməsi məsələləri müzakirə olunub.
Hüseyn Hüseynov qarşıda duran vəzifələri diqqətə çatdıraraq şöbə və fondların fəaliyyətinin daha da səmərəli təşkili, 2026-cı ilin ilk 6 ayı üzrə fəaliyyət hesabatının hazırlanması və görülən işlərin sistemləşdirilməsi ilə bağlı müvafiq tapşırıqlar verib.
Daha sonra, Mərkəzi Elmi Kitabxanada nəşr fəaliyyətinin mövcud vəziyyəti müzakirə edilib, MEK-in 100 yubileyinə həsr olunmuş “Mərkəzi Elmi Kitabxana 100 il elmin keşiyində” kitabı, “İnformasiya bülleteni”nin yeni buraxılışları, “Görkəmli elm xadimləri” seriyasında nəşr olunan biblioqrafiyalar Elmi-Metodiki Şuraya təqdim olunub.
İclas zamanı Şura üzvləri, AMEA-nın “Elm” nəşriyyatının direktoru, filologiya üzrə fəlsəfə doktoru Səbuhi Qəhrəmanov və elmi katib Şəbnəm Rüstəmova gündəlikdəki məsələlərlə bağlı rəy və təkliflərini bölüşüblər.
15:26 09.06.2026
Oxunuş sayı: 57
