Fransa Kipri silahlandırır: Türkiyəyə qarşı təxribat
"Politico" nəşrinin iddiasına görə, Fransa və Kipr arasında hərbi əməkdaşlığın genişləndirilməsi ilə bağlı saziş bazar ertəsi imzalanacaq.
Məlumata görə, saziş Fransa hərbi qüvvələrinin Kipr ərazisində fəaliyyətinin hüquqi çərçivəsini müəyyən edəcək.
Sənəd Fransız hərbçilərinin Kiprdə birgə hərbi təlimlər keçirməsi üçün şərtləri, eləcə də müdafiə sahəsində tərəfdaşlığın digər aspektlərini əhatə edəcək.
Razılaşma Fransa ilə Kipr arasında müdafiə əməkdaşlığının dərinləşdirilməsinə və Şərqi Aralıq dənizi regionunda təhlükəsizlik sahəsində koordinasiyanın gücləndirilməsinə xidmət edəcək.
Fransa ilə Kipr arasında hərbi əməkdaşlığın genişləndirilməsinə dair yeni sazişin imzalanması regionda təhlükəsizlik və geosiyasi balansla bağlı müzakirələri yenidən gündəmə gətirib.
Onun sözlərinə görə, Paris xüsusilə Afrikada zəifləyən təsir imkanlarını Aralıq dənizi hövzəsində, Cənubi Qafqazda və Mərkəzi Asiyada gücləndirməyə çalışır: “Fransa bu bölgələrdə, o cümlədən Türkiyəyə yaxın və dünya üçün strateji əhəmiyyət daşıyan ərazilərdə hərbi mövcudluğunu artırmaq niyyətindədir. Təəssüf ki, dünya daha çox hərbiləşməyə doğru gedir. Son illər hərbi xərclərin ən yüksək səviyyəyə çatdığı dövrlərdən biridir. Böyük dövlətlər müxtəlif regionlarda yeni hərbi müqavilələr bağlamağa və hərbi iştiraklarını genişləndirməyə çalışırlar. Fransa da bu istiqamətdə addımlar atır”.
Hərbi ekspert qeyd edib ki, Türkiyə də prosesləri diqqətlə izləyir və Şimali Kiprdəki mövcudluğunu daha da möhkəmləndirir: “Türkiyənin Şimali Kiprdə hərbi və siyasi mövcudluğu var. Ankara bu mövqeyini gücləndirməkdə davam edir. Lakin bu cür addımlar Kipr probleminin həllinə deyil, əksinə daha da mürəkkəbləşməsinə səbəb olur. Bununla belə, hesab edirəm ki, gec-tez adada iki dövlətin mövcudluğu reallıq kimi qəbul ediləcək – cənubda yunan, şimalda isə türk dövləti”.
E.Həsənli vurğulayıb ki, Türkiyə bölgədə baş verən prosesləri yaxından izləyir və öz təhlükəsizlik maraqlarına uyğun addımlar atır: “Necə ki, biz Ermənistanın Fransa, Hindistan, Çin və İranla əməkdaşlığını diqqətlə izləyirik, Türkiyə də Kipr ətrafında baş verən prosesləri diqqətdə saxlayır. Son illərdə Türkiyə müdafiə sənayesini əhəmiyyətli dərəcədə gücləndirib, həm Afrikada, həm Aralıq dənizi hövzəsində, həm də dünyanın müxtəlif regionlarında təsir imkanlarını artırıb. Fransa ilə Türkiyə arasında regional nüfuz uğrunda rəqabət davam edir və Fransa ilə Cənubi Kipr arasında imzalanan yeni saziş də məhz bu geosiyasi mübarizənin tərkib hissəsi kimi qiymətləndirilə bilər.
Zeynəb Həsən
17:48 08.06.2026
Oxunuş sayı: 58
