Bakıda Azərbaycan və Türkiyə xanımlarının təşkilatçılığı ilə sərgi keçirilib
Bakıda Azərbaycan və Türkiyə xanımlarının birgə təşkilatçılığı ilə 22-ci ənənəvi Xeyriyyə Sərgisi təşkil olunub.
Crossmedia.az xəbər verir ki, "Bir uşağın sabahına işıq ol!" şüarı altında keçirilən tədbirdən əldə olunacaq gəlir xeyriyyə məqsədlərinə-valideyn himayəsindən məhrum olmuş uşaqların təhsil xərclərinə sərf ediləcək.
Gəncliyə Yardım Fondunun H.Z. Tağıyev adına konfrans zalında keçirilən sərgi iki gün davam edib.
Tədbir çərçivəsində ziyarətçilərə müxtəlif qida məhsulları, geyimlər, suvenirlər, kitablar və əl işləri təqdim edilib.
Gəncliyə Yardım Fondunun rəhbəri Salih Zeki Meriç çıxış edərək bildirib ki, Azərbaycan xalqı tarix boyu ehtiyacı olanın yanında olmağı, əl tutmağı, paylaşmağı özünün mənəvi borcu hesab etmişdir. Xeyriyyəçilik bizim üçün sadəcə maddi yardım deyil, vicdanın, mərhəmətin və insan sevgisinin təzahürüdür. Qədim məhəllə ənənələrimizdən tutmuş, böyük xeyriyyəçilərimizin fəaliyyətinə qədər hər yerdə bu dəyərlərin izlərini görürük. Türk və Azərbaycan xalqlarının ortaq mədəniyyətində də yardımlaşma, qonşuya sahib çıxmaq, kimsəsizin əlindən tutmaq ən yüksək insani keyfiyyətlərdən biri hesab edilmişdir. Əsrlər boyu yaşadılan bu dəyərlər bu gün də bizi bir araya gətirir, cəmiyyətimizi daha güclü və daha mərhəmətli edir.
Türkiyə Cumhuruyyətinin Bakıdakı fövqəladə və səlahiyyətli səfiri Prof. Dr. Birol Akgünün həyat yoldaşı Zöhrə Akgün çıxış edərək sərgidə əməyi keçən Azərbaycan və Türkiyəli xanımlara öz təşəkkürünü bildirib. Xanım Akgün Azərbaycan və Türkiyə arasındakı qardaşlıq münasibətləri yalnız siyasi və iqtisadi sahələrdə deyil, həm də xeyriyyəçilik və sosial həmrəylik kimi mənəvi dəyərlərdə özünü göstərdiyini qeyd edib. Bu gün burada nümayiş olunan birlik və paylaşma ruhu cəmiyyətlərimizin ən gözəl xüsusiyyətlərindən biridir.
Şimali Kipr Türk Respublikasının Bakıdakı nümayəndəliyinin rəhbəri Ufuk Turganer çıxışında xeyriyyəçilik təşəbbüslərinin cəmiyyətlər arasında həmrəyliyi gücləndirdiyini və sosial məsuliyyət hissini artırdığını vurğulayıb. Ufuk Turganer təşkilatçılara təşəkkürünü bildidirib və müvəffqiyyətlər arzulayıb.
Qeyd edək ki, tədbirdə "Müasir İnkişaf" İctimai Birliyinin sədr müavini, filologiya üzrə fəlsəfə doktoru, türkoloq Tünzalə Əlizadəqızı və "Müasir İnkişaf" İctimai Birliyinin "Vətənpərvər Gənclər" klubunun koordinatoru Turqut Ansari də iştirak ediblər. Tədbir əsnasında Tünzalə Əlizadəqızı elmi-tədqiqat əsərini Azərbaycan Gəncliyə Yardım Fondunun rəhbəri Salih Zeki Meriçə təqdim edib, birlikdə xatirə şəkili çəkdirilib.
21:03 06.06.2026
Oxunuş sayı: 64
