Hadisə

Mərkəzi Elmi Kitabxana “Ayın kitabı” layihəsinin yekun tədbirində təmsil olunub

AMEA-nın Mərkəzi Elmi Kitabxanasının elmi katibi Şəbnəm Rüstəmova Hədəf STEAM liseyinin Nəsimi korpusunda keçirilən “Ayın kitabı” layihəsi üzrə 2025-2026-cı tədris ilinin yekun hesabat və mükafatlandırma tədbirində iştirak edib.

Crossmedia.az xəbər verir ki, layihə haqqında öz fikirlərini bölüşən Şəbnəm Rüstəmova mütaliə mədəniyyətinin formalaşdırılmasının uşaqların intellektual inkişafında, dünyagörüşünün zənginləşməsində və şəxsiyyət kimi yetişməsində mühüm rol oynadığını vurğulayıb. O qeyd edib ki, kitab oxumaq yalnız məlumat əldə etmək vasitəsi deyil, həm də analitik düşüncənin, nitq bacarıqlarının, yaradıcılıq qabiliyyətinin və milli-mənəvi dəyərlərə bağlılığın formalaşmasına xidmət edən mühüm amildir.

Şəbnəm Rüstəmova bildirib ki, mütaliəyə marağın məktəb yaşlarından aşılanması gələcəkdə savadlı, müasir düşüncəli və vətəninə faydalı vətəndaşların yetişməsinə zəmin yaradır. Bu baxımdan “Ayın kitabı” kimi layihələr şagirdlərin kitaba sevgisinin artırılması, onların müzakirə və təqdimat bacarıqlarının inkişaf etdirilməsi baxımından xüsusi əhəmiyyət daşıyır.

Elmi katib layihənin təşkilatçılarına, müəllimlərə və valideynlərə təşəkkürünü bildirərək, uşaqların kitabla dostluğunun möhkəmləndirilməsi istiqamətində həyata keçirilən belə təşəbbüslərin cəmiyyətin gələcəyinə qoyulan ən dəyərli sərmayələrdən biri olduğunu qeyd edib. 

O, çıxışının sonunda il ərzində layihədə fəallıq göstərən şagirdləri təbrik edib, onlara gələcək təhsillərində uğurlar arzulayıb və mütaliəni həyatlarının ayrılmaz hissəsinə çevirməyi tövsiyə edib.

Daha sonra balabilgələrə Mərkəzi Elmi Kitabxananın hədiyyələri təqdim olunub. İştirakçılar göstərilən diqqət və dəstəyə görə kitabxana rəhbərliyinə minnətdarlıqlarını ifadə ediblər.