Yubileyə həsr olunan konfrans bölmə iclasları ilə yekunlaşıb
Görkəmli alim və mətbuat tədqiqatçısı professor Şirməmməd Hüseynovun 100 illik yubileyinə həsr olunan "Azərbaycan mediası tarix və müasirlik" adlı beynəlxalq elmi-praktiki konfransın davamı kimi Jurnalistika fakültəsində "Azərbaycan televiziyası müstəqillik illərində: əsas inkişaf tendensiyaları", "Klassik publisistika və müasirlik", "Şirməmməd Hüseynov- Azərbaycan mətbuatı tarixinin görkəmli tədqiqatçısı kimi" mövzularda bölmə iclasları keçirilib.
Crossmedia.az xəbər verir ki,"Şirməmməd Hüseynov-Azərbaycan mətbuatı tarixinin görkəmli tədqiqatçısı kimi" və "Klassik publisistika və müasirlik" adlı panelləri giriş sözü ilə açan filologiya üzrə fəlsəfə doktoru Aygün Əzimova alimin həyatından bəhs edərək, onun dəyişən dünyanın dəyişməz həqiqətlərini ortaya qoyan şəxsiyyətlərdən olduğunu qeyd edib.
Ardınca söz Üsküdar Universitetinin rektoru Nazife Güngöre verilib. O, burada olmaqdan məmnun olduğunu bildirərək, Bakı Dövlət Universitetində peşəkar müəllimlərin olduğu və Şirməmməd müəllimin də o tip müəllimlər sırasında yer aldığını söyləyib.
"Azərbaycan televiziyası müstəqillik illərində: əsas inkişaf tendensiyaları" adlı bölmə iclasını Beynəlxalq jurnalistika və informasiya siyasəti kafedrasının müdiri, dosent Aynur Nəsirova açıb.
Çıxış edən məruzəçilər mövzu əsasında maraqlı təqdimatlar nümayiş etdiriblər.
Sonda iştirakçıların hər biri sertifikatlarla təltif edilib.
16:12 17.12.2024
Oxunuş sayı: 9938
