Hadisə
“Ailəm – mənim dəyərim” layihəsi çərçivəsində təlimlər həyata keçirilir
“Gəncliyə Dəstək” İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi ilə “Ailəm – mənim dəyərim” layihəsi çərçivəsində təlimlər həyata keçirilir.
Crossmedia.az xəbər verir ki, təlimlər Zərdab rayon Ş.Qurbanov adına 2 saylı tam orta məktəbdə və Dəkkəoba kənd tam orta məktəbində hər birində 30 şagirdin iştirakı ilə təşkil olunub. İştirakçılara papka, dəftər, qələm, buklet paylanıb.
Təlimlərdə layihə rəhbəri Vəfa Xəlilli donor və təşkilat haqqında iştirakçılara məlumat verib. Təlimçi Kəmalə Xəlilli şagirdlərlə həmsöhbət olaraq həm ailə dəyərlərini, həm Azərbaycan ailə modelinin əsasını şagirdlərə vurğulayıb. Şagirdlərlə ailə daxili sevginin, mərhəmətin və qayğının önəmindən danışılıb.
Tədbirlər zamanı iştirakçılara ailənin cəmiyyətin əsas sütunlarından biri olduğu, sağlam və möhkəm ailənin formalaşmasında qarşılıqlı hörmət, sevgi, etimad və anlayışın mühüm rol oynadığı barədə məlumat verilib. Təlimlərdə valideyn–övlad münasibətləri, ailədaxili ünsiyyət mədəniyyəti, məsuliyyət hissi və ailə üzvlərinin bir-birinə dəstəyi kimi mövzular geniş müzakirə olunub.
Layihənin əsas məqsədi şagirdlərdə ailəyə sevgi, hörmət və birlik kimi dəyərlərin formalaşdırılması, valideyn–övlad münasibətlərinin daha sağlam müstəvidə inkişafına dəstək göstərilməsi və cəmiyyətdə ənənəvi ailə institutunun möhkəmləndirilməsidir.
16:22 01.06.2026
Oxunuş sayı: 52
