PSJ yoxsa "Arsenal"? - Çempionlar liqasının yeni sahibi bu gün bəlli olur
Avropa futbolunun ən nüfuzlu klub turniri olan UEFA Çempionlar Liqasında bu gün mövsümün ən vacib qarşılaşması baş tutacaq.
Futbolsevərlərin böyük maraqla gözlədiyi final matçında Fransa nəhəngi PSJ ilə İngiltərə təmsilçisi "Arsenal" üz-üzə gələcək.
Hər iki komanda tarix yazmaq və mövsümü ən prestijli kubokla başa vurmaq üçün meydana çıxacaq.
Macarıstanın paytaxtı Budapeştdə yerləşən və 67 min tamaşaçı tutumuna malik "Puşkaş Arena"da keçiriləcək görüş həm də iki fərqli futbol ənənəsinin qarşıdurması kimi dəyərləndirilir.
Son illərdə Avropa futbolunun aparıcı qüvvələrindən birinə çevrilən PSJ ikinci dəfə qitənin ən böyük klub kubokunu qazanmağa çalışacaqsa, "Arsenal" uzun fasilədən sonra yüksəldiyi finalda tarixində ilk UEFA Çempionlar Liqası tituluna sahib olmaq niyyətindədir.
Maraqlıdır digər iki Liqada İngilis klubları kuboku öz vətənlərinə aparıb. Bəs ÇL finalında da Arsenal bu uğuru tamamlaya biləcəkmi?
Məsələ ilə bağlı Crossmedia.az-a açıqlama verən futbol üzrə Azərbaycan yığmasının sabiq məşqçisi Şahin Diniyev hazırkı göstəricilərə əsasən daha yaxşı formada olan tərəfin PSJ olduğunu qeyd edib:
"Luis Enrikenin rəhbərliyi altında komanda finala gedən yolda olduqca çətin sınaqlardan keçib. Xüsusilə, son mərhələlərdə taktiki baxımdan intizamlı və ağıllı futbol nümayiş etdirən Paris təmsilçisi rəqiblərinə qarşı üstün oyun sərgiləyərək həlledici görüşə vəsiqə qazanıb. Bir çoxlarının PSJ-nin şanslarını aşağı qiymətləndirdiyi məqamlarda komanda meydandakı performansı ilə bütün proqnozları dəyişməyi bacardı və Çempionlar Liqası təcrübəsinin nə qədər vacib olduğunu göstərdi.
Lakin bu amillər PSJ-nin mütləq qalib gələcəyinə zəmanət vermir. Söhbət finaldan gedir və belə qarşılaşmalarda hər bir detal nəticəyə təsir göstərə bilər. Buraya qədər yüksələn həm PSJ, həm də "Arsenal" bu kuboka layiq olduqlarını sübut ediblər.
Buna baxmayaraq, mövcud forma durumu və son oyunlardakı çıxışları nəzərə alındıqda, PSJ-ni cüzi üstünlüklə favorit hesab etmək olar. Ancaq bu, sadəcə proqnozdur. Futbolsevərlər üçün əsas gözlənti isə gərgin mübarizə və yüksək səviyyəli, maraqlı bir final izləməkdir".
Elmir Heydərli
10:55 30.05.2026
Oxunuş sayı: 67
