Mediaturların təşkili turizm və tanıtım üçün yeni imkanlar vəd edir
Azərbaycanda mediaturların təşkili son illərdə daha geniş vüsət alaraq, ölkənin turizm, mədəniyyət və biznes sahələrində tanıtım imkanlarını artırmağa xidmət edir. Bu təşəbbüslər beynəlxalq və yerli medianın diqqətini cəlb etməklə yanaşı, auditoriya arasında düzgün təəssürat yaratmaq üçün mühüm vasitədir. Mediaturlar həm də iqtisadiyyatın müxtəlif sektorlarının inkişafını təşviq edərək, Azərbaycanın müasir imicinin formalaşdırılmasında da önəmli rol oynayır. Effektiv təşkilatçılıq və ixtisaslaşmış yanaşma isə bu sahədə daha yüksək nəticələrə nail olmağa imkan verir.
Mövzu ilə bağlı media məsələləri üzrə ekspert Azər Həsrət Crossmedia.az-a verdiyi açıqlaması zamanı bildirib ki, Azərbaycanda mediaturların təşkil edilməsi xüsusilə daxili turizmin təşviqi baxımından məqsədəuyğundur və faydalıdır. Onun sözlərinə görə, media nümayəndələrinin ölkənin turizm bölgələrinə səfər edərək bu yerləri işıqlandırması, turizm potensialını geniş auditoriyaya çatdırmaq üçün əhəmiyyətli vasitələrdən biridir. Lakin bu sahədə qarşıya çıxan əsas çağırış isə jurnalistlərin ixtisaslaşması ilə bağlıdır:
“Hazırda turizm sahəsində, eləcə də digər sektorlarda ixtisaslaşmış jurnalistlərin sayı yetərli deyil. Turizm mövzularında həm yerli, həm də beynəlxalq səviyyədə dərin biliklərə malik jurnalistlərin azlığı hiss olunur. Bu isə mediaturların təsir gücünü məhdudlaşdırır. Belə turlarda ixtisaslaşmış jurnalistlərin iştirakı daha keyfiyyətli və hədəfli məzmun yaradılmasına mühüm töhfə verə bilər. Buna görə də mediaturların təşkilində məhz ixtisaslaşmış jurnalistlərə üstünlük verilməsi vacibdir. Lakin Azərbaycanda bu sahədə peşəkar kadrların azlığı təşkilatçıları çətinliklərlə üzləşdirir”.
A.Həsrət həmçinin mediaturlar zamanı yaradılan məzmunun keyfiyyətinin birbaşa jurnalistlərin peşəkarlıq səviyyəsindən asılı olduğunu da qeyd edib:
“Bəzi jurnalistlər turizm bölgələrinə səfərlər zamanı hazırladıqları məqalə və reportajlarla turizmin cəlbediciliyini artırır və bu sahəyə müsbət təsir göstərir. Lakin yalnız sadə şəkillər və ümumi paylaşımlar edən jurnalistlərin təsir dairəsi məhdud qalır. Keyfiyyətli kontent yaradılması üçün isə mütləq şəkildə ixtisaslaşma və professional yanaşma tələb olunur”.
Ekspert sonda peşəkar yanaşma ilə hazırlanmış kontentin həm yerli, həm də qlobal auditoriya üçün daha təsirli olduğunu və Azərbaycanın müasir imicinin formalaşdırılmasına töhfə verdiyini də vurğulayıb.
Mövzu ilə bağlı turizm üzrə ekspert Rəhman Quliyev də öz fikirlərini bildirib:
“Azərbaycanda daxili turizmin inkişafını təmin etmək üçün prioritet vəzifələrdən biri təbliğat və təşviqat işlərinin gücləndirilməsidir. Bunun üçün televiziya kanalları, xəbər proqramları və sosial media platformaları kimi bütün media vasitələrinin imkanlarından geniş şəkildə istifadə olunmalıdır. Eyni zamanda, regionlarımızda yerləşən turizm obyektləri, hotellər, istirahət mərkəzləri və digər turizm infrastrukturları haqqında ətraflı məlumatların təqdim edilməsi də vacibdir”.
R.Quliyev qeyd edib ki, əsas məqsəd yerli turistlərin ölkəmizin müxtəlif bölgələrinə marağını artırmaq və daxili turizm potensialından daha səmərəli istifadəni təşviq etməkdir. Onun fikrincə, bu təşəbbüs təkcə turizm sektorunun inkişafı ilə məhdudlaşmır, eyni zamanda regionlarda sosial-iqtisadi inkişafa təkan verir və yeni iş yerlərinin açılmasına da şərait yaradır:
“Azərbaycanda hər mövsümün özünəməxsus turizm imkanlarını nəzərə alaraq, ilin müxtəlif vaxtlarında tematik kampaniyalar təşkil etmək məqsədəuyğundur. Bu kampaniyalar mövsümə uyğun şəkildə qış mövsümündə dağ-xizək kurortları, qarla örtülü təbiət mənzərələri və digər qış turizminə uyğun xidmətlərin təbliği, Yay mövsümündə çimərliklər, dağ yürüşləri və yay istirahət mərkəzlərinin tanıtımı, yaz və payız mövsümlərində isə Azərbaycanın füsunkar təbiət mənzərələri, Qarabağ və Şərqi Zəngəzur iqtisadi rayonlarının ekoturizm potensialı ön plana çəkilməlidir”.
Ekspert onu da vurğulayıb ki, bu təşviqat kampaniyaları yalnız turizm sahəsinə fayda verməklə kifayətlənmir, eyni zamanda regionlarda kənd təsərrüfatı məhsullarının satışını artırır, yerli sahibkarlığa dəstək olur və kənd əhalisinin sosial rifahını da yüksəldir.
Rəhman Quliyev öz açıqlamasında Qarabağ və Şərqi Zəngəzurun prioritet rolu mövzusuna da toxunub:
“Xüsusilə Qarabağ və Şərqi Zəngəzur iqtisadi rayonları Azərbaycanın yeni turizm mərkəzləri kimi geniş şəkildə tanıdılmalıdır. Bu bölgələrin zəngin təbiəti, tarixi və mədəni irsi haqqında məlumatlar toplanaraq müxtəlif media platformaları vasitəsilə mütəmadi yayımlanmalıdır. Belə yanaşma həmin ərazilərdə turizmin canlanmasına şərait yaradacaq və beynəlxalq turistlər üçün də cəlbedici məkanlara çevrilməsini təmin edəcək”.
“Azərbaycanda daxili turizmin inkişafı yalnız turizm sektorunun deyil, bütövlükdə sosial-iqtisadi inkişafın vacib elementi kimi çıxış edir. Bu məqsədlə, ölkənin bütün regionlarını əhatə edən ardıcıl və mövsümə uyğun təbliğat kampaniyaları həyata keçirilməlidir. Belə yanaşma həm yerli turistlərin marağını artırar, həm də regionların iqtisadi inkişafına mühüm töhfə verər”, -deyə ekspert bildirib.
Aytac Bəhruzqızı
07:46 17.12.2024
Oxunuş sayı: 28735
