Yeni dövrdə Balakişi Qasımovdan gözləntilər nədir? - Cahangir Məmmədli danışdı
İctimai Televiziya və Radio Yayımları Şirkətində (İTV) rəhbər vəzifəyə yeni təyinat həyata keçirilib. Yayım Şurasının üzvlərinin yekdil səsverməsi ilə Balakişi Qasımov yenidən qurumun baş direktoru seçilib. Qərar televiziya qurumunun idarəçilik prosesində davamlılığın təmin olunması və əvvəlki dövrdə formalaşmış fəaliyyət xəttinin davam etdirilməsi baxımından diqqət çəkir. Qanunvericiliyə əsasən, İTV-nin baş direktoru 4 il müddətinə seçilir.
Bildirək ki, Balakişi Qasımov uzun illərdir media sahəsində fəaliyyət göstərir və televiziyanın idarə olunması, yayım siyasətinin formalaşdırılması və ictimai yayım prinsiplərinin inkişaf etdirilməsi istiqamətində müxtəlif vəzifələrdə çalışıb. O, İTV-nin baş direktoru kimi fəaliyyət göstərdiyi dövrlərdə qurumun institusional güclənməsi və proqram siyasətinin təkmilləşdirilməsi ilə bağlı layihələrdə iştirak edib.
BDU-nun Jurnalistika fakültəsinin Milli mətbuat tarixi kafedrasının müdiri, İTV Yayım Şurasının keçmiş sədri Cahangir Məmmədli, Crossmedia.az-la fikirlərini bölüşüb: “Balakişi Qasımov televiziyaya gələnə qədər də təcrübəli bir şəxs idi. Biz onun bilik və təcrübəsini daha əvvəlki illərdə də, çalışdığı xüsusi qruplarda görmüşük. O, dünyagörüşü baxımından çox təcrübəli insandır. İctimai televiziyanın ayrıca qanunu var. Televiziya və radio yayımı haqqında ümumi qanun mövcuddur, lakin ictimai televiziya ilə bağlı ayrıca hüquqi tənzimləmə də var. Həmin qanunda baş direktorun, yayım şöbəsinin və ümumilikdə ictimai televiziyanın vəzifələri aydın şəkildə göstərilib. O vəzifələrdən biri milli-mənəvi dəyərlərin inkişafı və qorunmasıdır. Bu baxımdan, bu gün ictimai televiziya milli-mənəvi dəyərləri ciddi şəkildə qoruyur və zənginləşdirirsə, bu, Balakişi Qasımovun son 4 illik fəaliyyətinin nəticəsidir. Ona görə də onun yenidən seçildiyini eşidəndə səmimi şəkildə sevindim. Balakişi bəy öz yerinə qayıtdı. Bu gün ictimai televiziya Azərbaycan ictimai fikrində önəmli yer tutur və bu mövqenin formalaşmasında Balakişi Qasımovun böyük rolu var. Mən bunu təqdir edirəm. Ümumilikdə isə ictimai televiziyada 12 il yayım üzrə rəhbər vəzifəsində çalışmış biri kimi, bu prosesdən məmnunam”.
Fatimə Məmmədova
19:32 26.05.2026
Oxunuş sayı: 82
