Türkiyə və Azərbaycan ali təhsil əməkdaşlığı genişləndirilməlidir
Azərbaycan və Türkiyə arasında ali təhsil sahəsində əməkdaşlıq münasibətləri son 20 ildə əhəmiyyətli dərəcədə inkişaf edib. Hazırda minlərlə azərbaycanlı tələbə Türkiyə universitetlərində təhsil alır. Bununla yanaşı, mütəxəssislər qarşılıqlı mübadilə proqramlarının genişləndirilməsinin və təhsil sistemləri arasında sıx əlaqələrin qurulmasının vacibliyini vurğulayırlar. İki qardaş ölkənin birgə layihələri təhsil sahəsində yeni imkanlar yaradır.
“Bu proses isə təkcə bir tərəfli olmamalıdır. Türkiyədən olan tələbələrin də Azərbaycanda təhsil alması vacibdir. Hazırda bu say çox azdır və artırılması istiqamətində işlər görülməlidir”.
Bu fikirləri Boğaziçi Universiteti Təhsil Fakültəsinin Dekanı Prof. Dr. İrfan Erdoğan Crossmedia.az-a müsahibəsində bildirib.
Professor qeyd edib ki, Azərbaycan və Türkiyə dil və mədəniyyət baxımından bir-birinə çox yaxın olan iki ölkədir və “Bir millət, iki dövlət” fəlsəfəsi çərçivəsində bu əlaqələrin daha da irəliyə aparılması mümkündür. Onun sözlərinə görə, Azərbaycanla bağlı tarixi, coğrafi və mədəni biliklərin, eləcə də Türkiyə ilə bağlı biliklərin hər iki ölkənin tədris proqramlarında daha geniş yer alması vacibdir. Azərbaycandan gələn tələbələr üçün seçmə fənlərin artırılması, müxtəlif təqaüd proqramlarının və kursların təşkili bu sahədə müsbət təsir göstərə bilər.
Son 20 ildə Azərbaycan-Türkiyə münasibətlərinin yüksək səviyyədə inkişaf etdiyini vurğulayan Prof. Dr. İrfan Erdoğan bu əməkdaşlığın daha da genişləndirilməsinin vacibliyini bildirib. O, yalnız tələbə mübadilə proqramlarının deyil, həm də universitetlərarası müəllim mübadilə proqramlarının həyata keçirilməsinin əhəmiyyətini qeyd edib:
“Müəyyən dövrlərdə universitet müəllimlərinin Erasmus proqramına bənzər modellər vasitəsilə hər iki ölkənin ali təhsil müəssisələrində fəaliyyət göstərməsi yeni layihələr çərçivəsində həm əməkdaşlığı gücləndirəcək, həm də təcrübə mübadiləsinə yol açacaq”.
O, həmçinin əlavə edib ki, Türkiyənin Azərbaycan təhsil sistemindən öyrənəcəyi məqamlar da mövcuddur: “Azərbaycan təhsil sistemində, xüsusilə məktəb pillələri və dərs müxtəlifliyi baxımından Türkiyə üçün nümunə olacaq pedaqoji baza mövcuddur. Bu təcrübələrdən Türkiyənin təhsil sistemində istifadə edilməsi məqsədəuyğundur”.
Müsahibənin sonunda Prof. Dr. İrfan Erdoğan iki ölkə arasında qeyri-rəsmi səviyyədə yüksək qarşılıqlı anlaşma və həmrəylik olduğunu vurğulayıb: “Hər iki ölkə eyni problemləri yaşadıqda, bir ürək kimi döyünür. Bu birlik və həmrəylik davam etməlidir, çünki bu əlaqələrdən yalnız fayda əldə edilir”.
Maral Şahverdili
13:59 14.12.2024
Oxunuş sayı: 24910
