Paşinyan Rusiyadan asılılığı azaltmağa çalışır, ona görə də... - Politoloq
Ermənistanın Baş naziri Nikol Paşinyan bildirib ki, ölkəsi Ukraynadakı müharibə kontekstində özünü Rusiyanın müttəfiqi hesab etmir.
"Mən Ukrayna Prezidentinin (Volodimir Zelenskinin - red.) İrəvana səfəri ilə bağlı artıq fikir bildirmişəm. Dəfələrlə demişəm ki, Ukrayna məsələsində biz Rusiyanın müttəfiqi deyilik", - Paşinyan qeyd edib.
O, həmçinin Almatı bəyannaməsini xatırladaraq, onun İrəvan üçün prinsipial əhəmiyyət kəsb etdiyini qeyd edib.
"Almatı bəyannaməsinin bizim üçün nə qədər vacib olduğunu bilirsiniz. Biz Azərbaycanla sülh prosesini məhz onun əsasında qururuq. Bu, bizim prinsipial mövqeyimizdir", - Baş nazir vurğulayıb.
Qeyd edək ki, mayın 4-də Ukrayna Prezidenti Volodimir Zelenski "Avropa Siyasi Birliyi"nin 8-ci sammitində iştirak etmək üçün İrəvana səfər edib.
Bəzi ekspertlərin fikrincə, Zelenskinin İrəvana səfəri və oradan verilən mesajlar açıq - aydın Erməmistanın Rusiya ilə hesablaşmasıdır.
Ədalət, Hüquq, Demokratiya (ƏHD) Partiyası İdarə Heyətinin üzvü, siyasi şərhçi Əli Zülfüqaroğlu isə Crossmedia.az-a açıqlamasında bildirib ki, Paşinyan Rusiya ilə münasibətlərinin normallaşmasına çalışsa da, digər tərəfdən onun əsas tərəfdaşlarından olan Avropa İttifaqı ilə əlaqələrinin də inkişafında maraqlıdır: “Ukrayna müharibəsi isə ilk növbədə Avropa İttifaqı üçün strateji əhəmiyyət daşıyır. Hazırda Ukraynaya ABŞ ilə müqayisədə Avropa İttifaqı daha ciddi dəstək verir. Məqsəd ənənəvi strateji xəttin, yəni tükəndirmə siyasətinin davam etdirilməsidir. Bilirsiniz ki, son zamanlar Ukrayna Rusiyaya ciddi zərər verib və cəbhədə dirəniş göstərir. Təbii ki, Ukraynanın istər cəbhədə güclü dirəniş göstərməsi, istərsə xalqın mübarizə əzminin qırılmamasında Avropa İttifaqının yardımları həlledici əhəmiyyət daşıyır”.
Əli Zülfüqaroğlu əlavə edib ki, Paşinyanın uzaq perspektivdəki hədəfi isə Avropa bazarlarına giriş imkanı qazanmaqla Rusiyadan asılılığı azaltmaqdır: “Bunun üçün Azərbaycanla sülh sazişi imzalanmalı, Türkiyə ilə sərhədlər açılmalı, eyni zamanda Avropa İttifaqı ilə münasibətlər inkişaf etdirilməlidir. Bu olmayacağı halda isə Ermənistan Rusiyanın forpostu statusundan xilas ola bilməyəcək. Bu baxımdan Paşinyan Avropa İttifaqının yürütdüyü siyasətlə kəskin ziddiyyət təşkil edən addım atmaq istəməz. Ona görə də Paşinyanın bu açıqlmasının Avropa İttifaqına mesaj xarakteri daşıması daha çox ehtimal edilə bilər”.
Turqut Ansari
19:00 09.05.2026
Oxunuş sayı: 55
