Yalan məlumatdan qorunmağın və etibarlı mənbələrin seçilməsinin əhəmiyyəti
Media savadlılığı müasir cəmiyyətdə önəmli bacarıqdır. İnformasiya texnologiyalarının sürətlə inkişaf etdiyi bir dövrdə fərdlər media məzmununu düzgün təhlil etməyi, etibarlı mənbələri müəyyən etməyi və yalan informasiyadan qorunmağı öyrənməlidir.
Mövzu ilə bağlı media eksperti Nəmənd Rüstəmov Crossmedia.az-a açıqlama verib: “İnternet əsrində, eyni zamanda sonsuz və müxtəlif çeşidli audiovizual kontentlərdə, fotolarda, fərqli datalarda və şaxələnmiş informasiya bolluğu dövründə yaşayırıq. Yəni istifadə etdiyimiz smart telefonlar, qacetlər, internetdəki çeşidli saytlar, portallar və sosial media platformaları informasiyanın mahiyyətini dəyişir. Nəticə etibari ilə dünyada hibrid müharibə anlayışı var və bunun mahiyyəti yalnız döyüşlər deyil. Hibrid müharibəni aparanların əsas fikirlərindən biri də kütləvi şüura təsir etməkdir. Uzun illərdir görürük ki, fikir ən güclü silahdır”.
Ekspert qeyd edib ki, “Azad ölkədə yaşayırıq və media sahəsində senzura tətbiqi yoxdur. Hər kəsin söz azadlığı var. Lakin bu informasiya axınının içində insan beyinləri uğrunda mübarizə gedir. Dəyərlər, mövqelər və fikirlər dəyişir. Bunu da keçən əsrlə bu günki bakı arasındakı fərqi müqayisədə aydın şəkildə görürük. Dünyagörüşü, geyim tərzi, dini dünyagörüş və dəyərlər indi sanki dəyişib. Bu qarşısı alınmaz qlobal problemdir və biz dünyanın bir parçasıyıqsa bunlardan qurtulma şansımız yoxdur”.
Nəmənd Rüstəmovun sözlərinə görə, “Hibrid müharibənin komponentlərindən biri də fikirləri yönəltmək və idarə etməkdir. Yalnız fərdi fikirləri deyil, kollektiv şüuru dəyişmək üçün işlər görülür. Bu yetərincə düşünülmüş, sistemli və planlı prosesdir. Bunun üçün də informasiya ekspansiyası gedir. Bura saxta informasiyalar, menecment və marketinq elementləri də daxildir. Bu fondan qalib gəlmək üçün biz hər kəsi qorumağın, hansı mənbələrə üstünlük vermənin faydalarından anlatmalıyıq”.
Qeyd edək ki, 16-22 dekabr tarixlərində Medianın İnkişafı Agentliyinin təşkilatçılığı ilə “Media Savadlılığı” həftəsi keçiriləcək.
Həftənin keçirilməsində əsas məqsəd insanlar arasında media savadlılığının vacibliyini vurğulamaq, gənclərin bilik və bacarıqlarının inkişafı, informasiya vasitələri üzərində qarşılıqlı əlaqələrin təşkilinin səmərəli təmin edilməsidir.
Fidan Hacızadə
09:53 14.12.2024
Oxunuş sayı: 29286
