Hadisə

Azərbaycan Dövlət Pedaqoji Kollecində beynəlxalq mühazirə keçiriləcək

15 may tarixində Azərbaycan Dövlət Pedaqoji Universitetinin nəzdində fəaliyyət göstərən Azərbaycan Dövlət Pedaqoji Kollecində müəllimlər üçün beynəlxalq səviyyəli mühazirə təşkil olunacaq.

Crossmedia.az xəbər verir ki, tədbirdə Rusiya Federasiyasının Rostovna-Donu şəhərindən dəvət olunmuş mütəxəssis, tibb üzrə fəlsəfə doktoru Nataliya Aleksandrovna Moskvicheva çıxış edəcək. Bakı şəhərində anadan olan mütəxəssis uzun illərdir müalicəvi pedaqogika sahəsində elmi-praktik fəaliyyət göstərir. O, Rostov Tibb İnstitutunda ali təhsil alıb, daha sonra Sankt-Peterburqda V.M. Bexterev adına Elmi-Tədqiqat İnstitutunda psixiatriya və psixoterapiya üzrə ixtisaslaşıb.

Eyni zamanda İsveçrə və Almaniyada müalicəvi pedaqogika üzrə beynəlxalq təlimlərdə iştirak edib. 1996-cı ildə onun təşəbbüsü ilə Rostov-na-Donuda “Sveça” (“Şam”) müalicəvi pedaqogika və sosial terapiya mərkəzi yaradılıb.

Mühazirə “Müalicəvi pedaqogika: xüsusi qayğıya ehtiyacı olan şəxslərə peşəkar yardımın göstərilməsi, onların inkişafı üçün əlverişli şəraitin yaradılması, həyat keyfiyyətinin yüksəldilməsi və cəmiyyətə inteqrasiyası” mövzusuna həsr olunacaq. Çıxışda müalicəvi pedaqogikanın multidissiplinar mahiyyəti, kompleks yanaşmalar və mütəxəssislərarası əməkdaşlıq məsələləri geniş müzakirə ediləcək.

Qeyd olunub ki, bu mühazirə Azərbaycanda müalicəvi pedaqogika istiqamətində keçirilən ilk tədbirlərdən biri kimi xüsusi əhəmiyyət daşıyır.

Tədbir 15 may saat 17:00-da Azərbaycan Dövlət Pedaqoji Kollecində baş tutacaq və müəllimlərin peşəkar inkişafına, inklüziv təhsilin təşviqinə və müasir pedaqoji yanaşmaların tətbiqinə töhfə verməsi gözlənilir.

🖨 Çap et

13:55 07.05.2026

Oxunuş sayı: 56