Netanyahu üçün sonun başlanğıcı?- Əgər məqsədlərinə çatmasa?
Siyasi proseslər və beynəlxalq gərginliklər fonunda İsrail ətrafında müzakirələr davam edir. Regionda baş verən hadisələr, xüsusilə Qəzza zolağındakı vəziyyət və İran–İsrail qarşıdurması, həm təhlükəsizlik, həm də siyasi balans baximından hələ də aktual bir mövzudur. Bu kontekstdə İsrailin daxili siyasi durumu və baş nazir Benyamin Netanyahunun mövqeyi ilə bağlı müxtəlif qiymətləndirmələr səsləndirilir.
İsraildəki daxili siyasi durumla bağlı Crossmedia.az-a açıqlama verən siyasi şərhçi Əhəd Məmmədlinin sözlərinə görə, liberallar uzun illərdir müxtəlif məsələlərdə hakimiyyəti tənqid edirlər: "Eyni vəziyyət digər ölkələrdə də müşahidə olunur. Hazırda davam edən müharibələr fonunda, xüsusilə Qəzza zolağında, əsirlərin hələ də azad edilməməsi ciddi suallar doğurur. Bu məsələ ilə bağlı tərəflərə təzyiqlər artır. Digər tərəfdən, İranla olan qarşıdurma kontekstində İsrailin müdafiə sistemi – “Dəmir Qübbə”nin effektivliyi də müzakirə mövzusudur. İran tərəfindən uzaq məsafələrdən atılan raketlərin İsrail ərazisinə çatması və bəzi şəhərləri hədəf alması da diqqət çəkir. Bu proseslər fonunda Benyamin Netanyahu uzun müddət İsrailin baş naziri kimi fəaliyyət göstərib".
Ə.Məmmədli söyləyib ki, bəzi fikirlərə görə, o, İsrail tarixində ən güclü baş nazirlərdən biri sayılır: "Şəxsi münasibətdən asılı olmayaraq, siyasi rəqibləri belə liderləri obyektiv qiymətləndirməyi vacib hesab edirlər. Netanyahunun həm ABŞ-lə, həm də İranla bağlı siyasəti İsrail daxilində müxtəlif reaksiyalar doğurur. Onun güclü siyasi dayaqları – yəhudi diasporası, mühafizəkar təbəqə və dini dairələr bu prosesdə mühüm rol oynayır. Lakin bu gərginliklər fonunda İsrailin Qəzza, Livan və digər cəbhələrdə qarşıya qoyduğu məqsədlərə tam şəkildə nail olub-olmayacağı sual altındadır. Əgər hədəflərə çatılmasa, bu, Netanyahunun siyasi mövqeyinə və daxili dəstəyinə təsirsiz ötüşməyə bilər".
Fatimə
18:29 06.05.2026
Oxunuş sayı: 48
