Paris-İrəvan strateji əməkdaşlığı - Fransa niyə yenidən Ermənistana bu qədər yaxınlaşır?
Cənubi Qafqazda geosiyasi dinamikanın sürətlə dəyişdiyi, eyni zamanda Ermənistanda daxili siyasi proseslərin gərginləşdiyi bir dövrdə rəsmi İrəvanın xarici siyasət addımları xüsusi diqqət mərkəzinə çevrilib.
Məhz belə bir mərhələdə Ermənistanın Fransa ilə strateji tərəfdaşlıq haqqında bəyannamə imzalaması həm regional güc balansı, həm də ölkədaxili siyasi gündəm baxımından maraqlı və çoxşaxəli qiymətləndirmələrə səbəb olur.
Bu addımın arxasında duran motivlər və mümkün nəticələr isə həm region ölkələri, həm də beynəlxalq aktorlar üçün ayrıca analiz tələb edir.
Mövzu ilə bağlı hərbi ekspert Üzeyir Cəfərov Crossmedia.az-a açıqlama verib:
“Ermənistanla Fransa arasında imzalanmış bu sənəd, əlbəttə ki, hər iki ölkənin milli maraqları əsasında hazırlanmış bir sənəddir və Fransa Prezidenti ilə Ermənistanın Baş naziri tərəfindən imzalanıb.
Burada əsas məqam Ermənistanla Fransanın süni intellekt, kiber təhlükəsizlik, yarımkeçiricilər, həmçinin hərbi texnologiyalar və müdafiə sənayesində istifadə olunan texnologiyaların birgə hazırlanması və öyrənilməsi sahəsində əməkdaşlığıdır.
Eyni zamanda, sənəddə hərbi sahədə əməkdaşlıq, o cümlədən hərbi əmlakın qarşılıqlı təchizatı məsələləri də öz əksini tapır. Fransa tərəfindən Ermənistana yük helikopterlərinin verilməsi nəzərdə tutulur.
Bununla yanaşı, Ermənistanın aviasiya sahəsi üçün NEO tipli sərnişin təyyarələrinin təqdim olunması planlaşdırılır. Ermənistanda tikinti sektorunda da Fransız şirkətlərinin iştirakı gözlənilir”.
Ekspert əlavə edib ki, bir sözlə, bu strateji tərəfdaşlığın ayrı-ayrı bəndləri, əlbəttə ki, hər iki ölkə üçün vacibdir:
“Lakin bu sənədin Azərbaycan üçün hər hansı bir təhlükə yaratdığını düşünmürəm. Çünki Azərbaycan da bir sıra ölkələrlə bu cür strateji tərəfdaşlıq sənədləri imzalayıb və imzalamaqda davam edir.
Bu baxımdan, biz bunu sadəcə Ermənistan-Fransa strateji tərəfdaşlığı kimi qiymətləndiririk. Əlbəttə, Ermənistanda seçkilər ərəfəsində bu sənəd Baş nazir Nikol Paşinyan üçün müəyyən siyasi üstünlük, bir növ əlavə bonus kimi də dəyərləndirilə bilər.
Çünki Fransa kimi aparıcı NATO və Avropa ölkəsinin Ermənistanla belə bir sənəd imzalaması daxili auditoriya üçün əhəmiyyətlidir.
Hesab edirəm ki, Ermənistanda keçirilən son Avropa tədbiri, eləcə də Fransa ilə yanaşı NATO, Ukrayna və digər ölkələrlə aparılan müzakirələr və imzalanan sənədlər ümumilikdə Ermənistan və Ermənistan xalqının xeyrinə işləyə bilər.
Bu nöqteyi-nəzərdən mən bu sənədə normal yanaşıram və arzu edirəm ki, bu əməkdaşlıq regionda sülhün və əmin-amanlığın möhkəmlənməsinə xidmət etsin”.
Ayhan
13:33 06.05.2026
Oxunuş sayı: 44
