Avropa Birliyi missiyasının fəaliyyəti barədə Azərbaycana doğru məlumat verilmir - AÇIQLAMA
Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev bildirib ki, iki ölkənin sərhədində üçüncü ölkənin qüvvələrinin yerləşdirilməsi narahatedici məsələdir. O qeyd edib ki, Ermənistanla Azərbaycan sərhədində Avropa Birliyi missiyasının yerləşdirilməsinə lüzum yoxdur. Bəs Avropa Birliyi missiyasının fəaliyyətinin Ermənistan-Azərbaycan münasibətlərinə təsiri nə qədər realdır? Üçüncü tərəfin sərhəddə olması, delimitasiya və demarkasiya prosesinə maneə yarada bilərmi?
Məsələ ilə bağlı politoloq Vaqif Hüseyn Crossmedia.az saytına açıqlamasında bildirib ki, ümumiyyətlə, bu missiya məsələsinin Azərbaycanı narahat edən bəzi məqamlar var:
"Azərbaycanın fikrincə, bu missiya əsl etməli olduğu funksiyanı yerinə yetirmir və burada onların qalmasının məqsədi tamamilə başqa bir məqsəd daşıyır. Buraya Ermənistanın sərhəddəki hərbi infrastrukturun gücləndirilməsini örtbastır etmək fəaliyyəti də daxildir. Təbii ki, bu, missiyanın funksiyasına daxil deyil, yəni Azərbaycan belə hesab edir ki, Ermənistan əslində bu “missonerlər”in pərdəsi altında bölgədə hərbi infrastrukturunu gücləndirə bilər və bu da on-on beş il sonra Azərbaycana yeni hücum üçün yol aça bilər. İkinci məsələ isə odur ki, həmin missiyanın əsl işinin nədən ibarət olduğu göstərilmir, missiyanın fəaliyyəti barədə Azərbaycana doğru, müfəssəl şəkildə məlumat verilmir. Əgər bu, Avropa Birliyinin missiyassıdırsa, tərəflərə bərabər və obyektiv şəkildə yanaşılmalıdır. Digər tərəfdən missiyanın tərkibinin kimlərdən ibarət olduğu barədə də Azərbaycan tərəfinə doğru informasiya çatdırılmır. Ola bilər ki, missiya adı altında bura xarici ölkələrin kəşfiyyat strukturları da yerləşdirilsin, bu da təbii ki, narahatlıq üçün əlavə bir problemdir”.
Həmçinin politoloq qeyd edib ki, Azərbaycan göstərmək istəyir ki, əgər hər hansısa bir dövlətin burada hərbi və ya digər bir gücü varsa, bu regional problemlərin ikitərəfli həllinə ciddi şəkildə maneə olan bir vasitədir:
"Qeyd etmək lazımdır ki, Azərbaycan artıq öz ərazisindən Rusiya hərbçilərinin çıxarılmasına nail olub, indi eyni məsələni Ermənistandan da gözləyir. Bu, Rəsmi Bakının fikrincə, ikitərəfli münasibətlərin qurulmasına da töhfə vermiş olar. Azərbaycan dəfələrlə bəyan edib ki, regional problemlərin həllində Ermənistanla birbaşa danışıqlara hazırdır, Ermənistan ekspertlərinin isə fikrindən belə çıxır ki, birbaşa Azərbaycanla danışıqlara hazır deyillər və daima vasitəçilərlə oturmağa çağırırlar. Ona görə də həmin o missiya deyilən hərbi varlığın nə dərəcədə düzgün şəkildə bölgəsəl münasibətlərin həllinə töhvə verəcəyi Rəsmi Bakıda ciddi şübhələr oyadır. Bu səbəblə Azərbaycan həmin missiyanın çıxarılmasının vacibliyini vurğulayıb".
Gülşad İbrahimova
13:05 13.12.2024
Oxunuş sayı: 13082
