Marsol Group nümayəndə heyətinin Elvin Paşayev ilə görüşü baş tutub
1 may tarixində Şəki səfəri çərçivəsində Marsol Group nümayəndə heyətinin Qax Rayon İcra Hakimiyyətinin başçısı Elvin Paşayev ilə görüşü baş tutub.
Crossmedia.az xəbər verir ki, Marsol Group və İş Adamları Cəmiyyətinin Milli Assosiasiyasının (İCMA) təşkilatçılığı ilə baş tutan görüşdə Marsol Group və Region partnyoru olan sahibkarlarla yanaşı, Qax rayonunda fəaliyyət göstərən sahibkarlar da iştirak ediblər.
Görüş zamanı Qax Rayon İcra Hakimiyyətinin başçısı Elvin Paşayev çıxış edərək ölkədə sahibkarlığın inkişafı istiqamətində dövlət tərəfindən həyata keçirilən tədbirlərdən danışıb. Qeyd olunub ki, regionlarda biznes mühitinin yaxşılaşdırılması, sahibkarlara göstərilən dəstək mexanizmlərinin genişləndirilməsi və yeni investisiya imkanlarının yaradılması iqtisadi siyasətin əsas prioritetlərindəndir. Bildirilib ki, Qax rayonu kənd təsərrüfatı, turizm və emal sənayesi sahələrində geniş potensiala malikdir və bu istiqamətlərdə sahibkarlığın inkişafı üçün əlverişli şərait formalaşdırılıb.
Həmçinin, Marsol Group və İCMA-nın İdarə Heyətinin sədri Tural Mustafayev çıxış edərək Marsol Group-un sahibkarlığın inkişafı istiqamətində həyata keçirdiyi layihələr barədə məlumat verib, bu kimi görüşlərin regionlarda sahibkarlığın inkişafına, işgüzar əlaqələrin genişlənməsinə və yeni əməkdaşlıqların formalaşmasına mühüm töhfə verdiyini vurğulayıb.
Tədbir çərçivəsində iştirakçılar arasında qarşılıqlı tanışlıq baş tutub, sahibkarlar öz fəaliyyətləri barədə məlumat verərək biznes mühiti ilə bağlı fikir mübadiləsi aparıblar.
Ən sonda isə, Marsol Group tərəfindən Qax Rayon İcra Hakimiyyətinin başçısı Elvin Paşayevə xatirə hədiyyəsi təqdim edilib.
20:06 02.05.2026
Oxunuş sayı: 58
