İran nüvə silahı əldə edir? - ABŞ-dən xəbərdarlıq
“Biz həmişə açıq şəkildə bildirmişik ki, Prezident Co Bayden heç vaxt İranın nüvə silahı əldə etməsinə icazə verməyəcək, ancaq Tehranın bu silahı əldə etmək cəhdləri barədəki ehtimaldan hələ də narahatıq”.
Bunu ABŞ Dövlət Departamentinin sözçüsü Metyu Miller deyib.
İranın nüvə silahı əldə etməsi ehtimalı beynəlxalq ictimaiyyətin diqqət mərkəzində olan ən vacib mövzulardan biridir. İranın nüvə proqramı ətrafında yaranan gərginliklər, həm diplomatik səyləri, həm də hərbi münaqişə risklərini gündəmə gətirir.
Bəs İranın nüvə silahı əldə etməsi ABŞ və Avropanın Orta Şərq siyasətini necə təsir edər?
ABŞ-nin İranın nüvə proqramına qarşı tətbiq etdiyi sanksiyalar nə qədər effektivdir?
Məsələ ilə bağlı Crossmedia.az saytına açıqlama verən siyasi şərhçi Əziz Əlibəyli bildirib ki, hazırda nüvə məsələsinin və ya onun saflaşdırılmasının gündəmə gətirilməsi iki vacib məqamı aktuallaşdırır:
“Birincisi, Suriyadakı məğlubiyyətin əvəzini çıxmaq məqsədilə İran ildə xərclədiyi 6 milyard dolları daxili resursların inkişafına və nüvə proqramını daha sürətli şəkildə tamamlamağa sərf edir. İkincisi isə İranın nüvə silahı əldə etmə məsələsidir. Ümumilikdə, nüvə əldə etmə mövzusu gündəmə gətiriləndə, onun məhv edilməsi üçün əsas yaratmaq ideyası üstünlük təşkil edir. Böyük ehtimalla, tərəflər arasında razılığa gəlməkdən daha çox, hadisələrin bu istiqamətdə inkişaf etdiyini müşahidə edəcəyik”.
Gülay Məmmədova
17:40 11.12.2024
Oxunuş sayı: 10151
