ABŞ müharibəni davam etdirmək niyyətində deyil - Ekspert
Yaxın Şərqdə baş verən son proseslər və əldə olunan atəşkəsin perspektivləri beynəlxalq müstəvidə müzakirə olunmağa davam edir. Regionda vəziyyətin sabitliyi ilə bağlı müxtəlif yanaşmalar mövcuddur. Atəşkəsin uzunmüddətli olub-olmayacağı isə ekspertlər tərəfindən fərqli qiymətləndirilir.
Hərbi ekspert Səxavət Məmməd Crossmedia.az-a açıqlamasında qeyd edib ki, atəşkəslə prosesin tamamilə həll olacağı və hər şeyin tamamilə sakit mərhələyə keçəcəyini gözləmək doğru deyil: "Ümumiyyətlə, atəşkəslər həmişə kövrək olur və təbii ki, atəşkəslə bağlı müxtəlif iddialar ortaya atıldı. Məsələn, İsrail tərəfi xüsusilə qeyd edirdi ki, Livanla bağlı heç bir sənəd ortalıqda yoxdur. Axırda hətta bu prosesi aparan tərəf Pakistan belə qeyd etdi ki, danışıqlar prosesində, atəşkəs məsələsində Livan məsələsi ortaya çıxıb. Bunu sonra Fransa da qeyd etdi. Müxtəlif tipli fikirlər var. Tərəflər bir-birinə həm də güc nümayiş etdirmək istəyir. İstər bəyanatlar vasitəsilə, istərsə də sahədə hansısa bir formada güclərini göstərməyə çalışırlar. Amma reallıq ondan ibarətdir ki, ABŞ artıq müharibəni davam etdirmək niyyətində deyil. Yəni bunu açıq şəkildə görmək mümkündür. İsrail isə deyir ki, onlar heç bir arzularına, yəni İranla bağlı heç bir məqsədlərinə nail olmayıb".
O, hesab edir ki, indiki mərhələdə bu gərginlik müəyyən mənada belə davam edir, lakin görünür ki, ilk gündən fərqli olaraq nisbətən azalmağa doğru gedib: "Çünki ABŞ də İsraildən tələb edib ki, Livana qarşı əməliyyatları dayandırsın və artıq orada da səngimələr baş verib. Yəni ümumi hər şey İslamabadda keçirilən danışıqlardan asılı olacaq. Əgər orada danışıqlar müsbət formada davam edəcəksə və tərəflər, istər ABŞ, istər İsrail, istər İran şərtlərində yumşalmaya gedəcəklərsə, müəyyən mənada şərtlərlə bağlı razılıq əldə olunacaq və sülhə nail olunacaq. Yox, əgər şərtlər eyni formada qalacaq və uzlaşma əldə olunmayacaqsa, hesab edirəm ki, bu gərginlik daha sonra yenidən hərbi toqquşmaya gətirib çıxaracaq".
Fatimə
20:24 10.04.2026
Oxunuş sayı: 121
