Azərbaycan–Gürcüstan münasibətləri və yeni regional reallıqlar
2026-cı il aprelin 6-da Prezident İlham Əliyevin Gürcüstana sfəri zamanı mətbuata verdiyi bəyanat həm ikitərəfli münasibətlərin hazırkı vəziyyətini, həm də regionda baş verən siyasi və geosiyasi prosesləri əhatə edən geniş məzmunlu çıxış kimi diqqət çəkir. Bu bəyanat göstərir ki, Azərbaycan ilə Gürcüstan arasında formalaşmış əlaqələr artıq uzunmüddətli strateji tərəfdaşlıq səviyyəsinə yüksəlmiş və regional sabitliyin əsas sütunlarından birinə çevrilmişdir.
Azərbaycan–Gürcüstan münasibətlərinin əsasını qarşılıqlı hörmət, etimad və beynəlxalq hüququn prinsiplərinə sadiqlik təşkil edir. Hər iki ölkə bir-birinin suverenliyini və ərazi bütövlüyünü ardıcıl şəkildə dəstəkləyir və bu mövqe ikitərəfli əməkdaşlığın dəyişməz prinsipi kimi çıxış edir. Bu yanaşma xüsusilə mürəkkəb beynəlxalq münasibətlər sistemində mühüm əhəmiyyət kəsb edir, çünki regionda sabitliyin qorunması üçün qarşılıqlı dəstək və etibarlı tərəfdaşlıq vacib amillərdir.
Bununla yanaşı, Azərbaycan ilə Gürcüstan arasında əməkdaşlıq siyasi sahə ilə məhdudlaşmır. İqtisadi münasibətlər, xüsusilə enerji və nəqliyyat sahəsində həyata keçirilən birgə layihələr bu tərəfdaşlığın real nəticələrini əks etdirir. Region üçün strateji əhəmiyyət daşıyan enerji kəmərləri və nəqliyyat dəhlizləri məhz bu iki ölkənin birgə təşəbbüsü ilə reallaşdırılmışdır. Bu layihələr sayəsində Cənubi Qafqaz beynəlxalq enerji təhlükəsizliyində və qlobal nəqliyyat sistemində mühüm rol oynayan bölgələrdən birinə çevrilmişdir. Eyni zamanda, bu əməkdaşlıq Avropa ilə Asiya arasında iqtisadi əlaqələrin inkişafına da mühüm töhfə verir.
Cənab prezident İlham Əliyev çıxışında Gürcüstana səfərindən məmnunluğunu ifadə edərək bu ölkəni qardaş dövlət kimi xarakterizə etmiş və “yenidən qardaş Gürcüstanda olmaq mənim üçün böyük şərəfdir” fikrini səsləndirmişdir. Bu ifadə iki ölkə arasında münasibətlərin yüksək səviyyədə olduğunu və qarşılıqlı dostluq əlaqələrinin möhkəm təməllərə söykəndiyini göstərir. Bu yanaşma onu deməyə əsas verir ki, Azərbaycan ilə Gürcüstan arasındakı əlaqələr yalnız rəsmi diplomatik çərçivədə deyil, eyni zamanda səmimi və etibarlı münasibətlər üzərində qurulmuşdur.
Səfər çərçivəsində keçirilən yüksək səviyyəli görüşlər də göstərir ki, iki ölkə arasında siyasi dialoq intensiv və davamlı xarakter daşıyır. Bu dialoq regional məsələlərin müzakirəsi, qarşılıqlı maraqların uzlaşdırılması və gələcək əməkdaşlıq istiqamətlərinin müəyyənləşdirilməsi baxımından xüsusi əhəmiyyətə malikdir. Bu cür əlaqələr regionda sabitliyin möhkəmləndirilməsi və mümkün risklərin qarşısının alınması üçün mühüm rol oynayır.
Bəyanatda xüsusi yer tutan əsas məqamlardan biri də Cənubi Qafqazda yaranan yeni vəziyyətlə bağlıdır. Prezident İlham Əliyev qeyd etmişdir ki, regionda tamamilə yeni reallıqlar formalaşmaqdadır. Bu reallıqlar özünü ilk növbədə əməkdaşlıq imkanlarının genişlənməsi, iqtisadi əlaqələrin dərinləşməsi və nəqliyyat-kommunikasiya xətlərinin inkişafı ilə göstərir. Əvvəllər daha çox münaqişələrlə xarakterizə olunan bu region tədricən əməkdaşlıq və qarşılıqlı fayda əsasında inkişaf edən bir məkana çevrilməkdədir.
Yeni mərhələdə sülhün təmin olunması üçün yalnız siyasi bəyanatların kifayət etmədiyi, konkret praktiki addımların atılmasının vacibliyi vurğulanmışdır. Bu baxımdan iqtisadi layihələr, ticarət əlaqələrinin genişləndirilməsi və region ölkələri arasında qarşılıqlı asılılığın artırılması mühüm rol oynayır. Bu yanaşma uzunmüddətli sabitliyin və təhlükəsizliyin təmin olunmasına xidmət edir.
Gürcüstanın bu prosesdə rolu xüsusi qeyd olunmalıdır. Bu ölkə öz coğrafi mövqeyinə görə regionda əsas tranzit mərkəzlərindən biri kimi çıxış edir və Şərq ilə Qərb arasında körpü rolunu oynayır. Azərbaycan ilə Gürcüstan arasında qurulan sıx əməkdaşlıq da məhz bu tranzit və iqtisadi imkanların daha effektiv istifadəsinə şərait yaradır. Bu isə bütövlükdə Cənubi Qafqaz regionunun inkişafına müsbət təsir göstərir.
Nəticə etibarilə, cənab Prezident İlham Əliyevin bu səfər çərçivəsində verdiyi bəyanat Azərbaycan–Gürcüstan münasibətlərinin yüksək səviyyədə olduğunu bir daha təsdiqləyir və bu əlaqələrin gələcəkdə daha da genişlənəcəyini göstərir. Eyni zamanda, bu çıxış Cənubi Qafqazda yeni siyasi və iqtisadi mərhələnin formalaşdığını nümayiş etdirir. Bu mərhələ əməkdaşlıq, qarşılıqlı fayda və davamlı sülh prinsipləri üzərində qurulmuşdur və regionun gələcək inkişaf perspektivlərini müəyyən edən əsas istiqamət kimi çıxış edir.
Kamran Quliyev
YAP Yasamal rayon “Moskva pr. 67” ünvanı (ADSEA) üzrə ərazi partiya təşkilatının sədr müavini.
10:41 09.04.2026
Oxunuş sayı: 56
