Bakı-Ələt yolunda ciddi problem - İşıqsızlıq və yararsız yollar təhlükə yaradır
Bakı-Ələt-Astara magistral yolunun bəzi hissələrində işıqlandırma sisteminin işləməməsi və yol örtüyünün yararsız vəziyyəti sürücülər üçün ciddi təhlükə yaradır.
Xüsusilə, Nəvahi ərazisində yaranmış iri çuxurların 15-ə yaxın avtomobilə ziyan vurduğu bildirilir ki, bu da yol infrastrukturunda nəzarət və keyfiyyət məsələlərini yenidən gündəmə gətirib.
Mövzu ilə bağlı Crossmedia.az-a açıqlamasında nəqliyyat eksperti Elməddin Muradlı bildirib ki, ölkədə yolların keyfiyyəti ilə bağlı ciddi problemlər mövcuddur və bu məsələlər artıq rəsmi səviyyədə də etiraf olunub, mövcud problemlər səbəbindən məsul qurumda dəyişikliklər də baş verib:
"Yolların keyfiyyəti ilə bağlı bizdə çox ciddi problemlər var. Elə buna görə də, Azərbaycan Avtomobil Yolları Dövlət Agentliyinin rəhbərliyi işdən çıxarıldı. Hazırda bu istiqamətdə araşdırmalar aparılır, yeyinti və digər neqativ hallarla bağlı tədbirlərin görülməsi planlaşdırılır".
Ekspert qeyd edib ki, son illərdə yolların yenidən qurulması geniş vüsət alsa da, təhlükəsizlik məsələləri arxa plana keçib:
"Təəssüflər olsun ki, yollarımızın böyük hissəsində başdan-sona təmir və asfaltlama işləri aparılıb, amma təhlükəsizlik komponenti lazımi səviyyədə nəzərə alınmayıb. Bu isə həm insan həyatı, həm də sürücülərin maddi zərərlə üzləşməsi baxımından ciddi risklər yaradır. Bu cür hallara görə məsul şəxslər ciddi şəkildə cəzalandırılmalı, onlar barəsində ciddi tədbirlər görülməlidir. Əks halda bu problemlər təkrarlanacaq və sürücülər yenə eyni risklərlə üz-üzə qalacaq".
Xüsusilə, Hacıqabul və Nəvahi istiqamətində vəziyyətin daha kritik olduğunu qeyd edən ekspert bildirib ki, həmin ərazilərdə yol təsərrüfatı çox bərbad vəziyyətdədir.
"Ümumiyyətlə, Bakı-Qazax yolu boyunca – Nəvahi, Hacıqabul, Şirvan şəhəri ərazisindən keçən magistral, eləcə də Sabirabad istiqamətində yolların vəziyyəti kifayət qədər problemlidir. Bu ərazilərdə yol örtüyünün qısa müddətdə sıradan çıxması həm keyfiyyətsiz tikinti işləri, həm də nəzarət mexanizmlərinin zəifliyi ilə bağlıdır" - deyə, o vurğulayıb.
"Mən həmin yollardan tez-tez istifadə edirəm və real vəziyyəti görürəm. Bu problemlər təsadüfi deyil, sistemli yanaşma çatışmazlığının nəticəsidir. Magistral yollarda mütəmadi monitorinq mexanizmləri formal xarakter daşıyır və nəticədə problemlər vaxtında aşkar edilmir. Əgər effektiv monitorinq olsaydı, bu qədər sayda avtomobilin zədələnməsinə səbəb olan çuxurlar əvvəlcədən aşkar edilər və aradan qaldırılardı" - deyə, o bildirib.
Sonda ekspert qeyd edib ki, yol infrastrukturunda keyfiyyət və təhlükəsizlik məsələlərinə yanaşma dəyişmədiyi təqdirdə, bu cür hallar gələcəkdə də davam edəcək.
Nigar Yahyazadə
13:01 01.04.2026
Oxunuş sayı: 642
