Taksi soyğunçuluğu - gənclər niyə kriminala meyl edir?
Abşeronda taksi sürücüsünə qarşı törədilən soyğunçuluq hadisəsi cəmiyyətdə təhlükəsizlik və cinayətkarlığın artma səbəbləri ilə bağlı müzakirələri yenidən gündəmə gətirib.
26 yaşlı əvvəllər məhkum olunmuş şəxsin mobil telefon ələ keçirmək məqsədilə zor tətbiq etməsi, xüsusilə gənc nəsildə müşahidə olunan neqativ meyillərin və sosial-iqtisadi faktorların təsirini bir daha üzə çıxarır.
Bu tip halların qarşısının alınması üçün hüquq-mühafizə tədbirləri ilə yanaşı, problemin kökünə enmək və preventiv addımlar atmaq zərurəti yaranıb.
Məsələnin sosioloji tərəfləri, cinayətə sövq edən amillər və çıxış yolları ilə bağlı Crossmedia.az-a açıqlamasında sosioloq Əhməd Rəhmanov bildirib ki, istənilən kriminal hadisənin əsasında sosial problemlər dayanır:
"Xırda oğurluq halları həmişə olub və olacaq. Məsələ onların miqyası və yayılma səviyyəsidir. Bu kimi halların qarşısını almaq üçün ilk növbədə sosial səbəblərə diqqət yetirilməlidir.
İnsanların real iş imkanlarına çıxışı zəifdir. Məşğulluq xidmətlərinə müraciət edən vətəndaşlar çox vaxt konkret və davamlı iş təklifləri ilə qarşılaşmırlar. Bu isə alternativ qazanc yolları olmayan şəxsləri riskli addımlara sövq edə bilir".
Sosioloq qeyd edib ki, iqtisadi alternativlərin mövcudluğu kriminal davranışların azalmasına birbaşa təsir göstərir:
"Əgər insan bilsə ki, qısa müddətdə halal yolla müəyyən məbləğ qazana bilər, o, kiçik məbləğ üçün cinayət törətməyə meyilli olmaz. Məsələn, kiminsə mobil telefonunu oğurlayıb cüzi məbləğə satmaq əvəzinə, eyni pulu əmək fəaliyyəti ilə əldə etmək daha rasional seçim olardı".
Onun fikrincə, problemin həlli üçün kompleks yanaşma vacibdir:
"Yeni iş yerlərinin yaradılması, sosial rifahın yaxşılaşdırılması və əhalinin məşğulluq imkanlarının genişləndirilməsi bu kimi halların sayının azalmasına mühüm təsir göstərə bilər".
Nigar Yahyazadə
13:19 26.03.2026
Oxunuş sayı: 49
