Simonyan Türkiyəyə gedir: Mühüm mərhələ başlayır
Ermənistan parlamentinin spikeri Alen Simonyanın başçılıq etdiyi nümayəndə heyəti İstanbula səfər edəcək.
Parlamentin deputatları aprelin 16-19-da Parlamentlərarası İttifaqın iclasında iştirak edəcəklər.
Qeyd olunur ki, nümayəndə heyətinin tərkibinə deputatlar Sarkis Xandanyan, Tsovinar Vardanyan və Asmik Akopyan da daxil olacaq. Bundan başqa, parlament aparatının üzvləri də Türkiyəyə səfər edəcəklər.
Gözlənilən səfərlə bağlı türkiyəli politoloq, professor Hüsametdin İnaç Crossmedia.az-a danışıb: "Məlum olduğu kimi, 2025-ci ilin 8 avqustunda Vaşinqtonda ABŞ-nin vasitəçiliyi ilə əldə olunan razılaşmalardan sonra Cənubi Qafqazda yeni mərhələ başlandı. Azərbaycanla Ermənistan arasında münasibətlərin normallaşdırılması istiqamətində əhəmiyyətli irəliləyiş əldə olundu. Eyni zamanda Zəngəzur dəhlizi TRİPP marşrutu adı altında aktuallıq qazandı. Problemlər tədricən həll olunur. Həm Ermənistan- Azərbaycan, həm də Ermənistan- Türkiyə xəttində mühüm addımlar atılır. Ermənistan artıq saxta "erməni soyqırımı" iddiasından imtina edir, həmçinin konstitusiya dəyişikliyi məsələsi gündəmə gəlib. Bu isə o deməkdir ki, İrəvan Ankara və Bakıya qarşı torpaq iddialarından əl çəkir".
Müsahibimiz söyləyib ki, qarşıdan gələn parlament seçkilərində hazırkı baş nazir Nikol Paşinyanın qalib gəlmə ehtimalı çoxdur: "Bundan sonra tamamilə yeni səhifə açıla bilər. Bütün bunları nəzərə alsaq deməliyik ki, Simonyanın Türkiyəyə səfəri vacib mərhələ ola bilər. Əlbəttə, Türkiyə bütün addımlarında Azərbaycanın maraqlarını nəzərə alacaq. Bakı isə hazırkı ritorikası ilə, o cümlədən neft ixracı ilə göstərir ki, münasibətlərin normallaşmasında maraqlıdır. Şərqi Avropada və Yaxın Şərqdə müharibələrin davam etdiyi bir vaxtda Cənubi Qafqazda sabitlik çox mühümdür".
14:13 16.03.2026
Oxunuş sayı: 57
