Azərbaycan və Türkiyə hazır olmalıdır: Mümkün təxribatların anonsu verildi!
Yaxın Şərqdə müharibə davam edir. Bir neçə gün əvvəl İrandan Türkiyə ərazisinə növbəti dəfə raket atıldı. Bu, ilk belə hal deyil. Türkiyə rəsmiləri, o cümlədən Prezident Rəcəb Tayyib Ərdoğan və xarici işlər naziir Hakan Fidan məsələ ilə bağlı qəti mövqe ortaya qoyublar.
Türkiyənin hədəf alınması ilə bağlı fərqli versiyalar var.
Türkiyəli politoloq Cantürk Caner bu barədə Crossmedia.az-a danışıb: "Son bir neçə gündə İranla müharibə səbəbindən Türkiyəyə üç raket atılıb. Bu raketlərin dəqiq hədəfləri açıqlanmasa da, onların əsasən Türkiyə vasitəsilə Kiprdəki Britaniya bazalarını hədəf almaq üçün nəzərdə tutulduğu güman edilir. Bu münaqişə zamanı Azərbaycanın Naxçıvan bölgəsinə kamikadze hücumunun da şahidi olduq. Sanki gizli bir qüvvə, gizli bir əl Türkiyəni və Azərbaycanı İranla müharibəyə cəlb etməyə çalışır. Bu məsələ ilə bağlı Prezident İlham Əliyevin xüsusilə sərt açıqlamalarını gördük və bu açıqlamalar açıq şəkildə haqlı idi, çünki həm Türkiyə, həm də Azərbaycan İranın ərazi bütövlüyünə, İranın sabitliyinə ürəkdən inanır və arzulayır, İrandakı müharibənin daha da dağıntılara səbəb olmayacağına inanır. Həqiqətən də, Azərbaycan lap əvvəldən İrana yardım yük maşınları göndərir. Lakin iki ölkəni raketlərlə təhrik etmək əslində xoşagələn deyil".
O, xatırladıb ki, İran Prezidenti Məsud Pezeşkian və xarici işlər naziri Abbas Əraqçi Azərbaycan və Türkiyə rəsmiləri ilə telefon danışıqlarında İran dövlətinin bunu etmədiyini və məsələnin araşdırılmalı olduğunu bildirərək, İran daxilindəki müəyyən agentlərin Türkiyə və Azərbaycanı təxribat etmək üçün belə bir plan hazırladıqlarının ehtimalının yüksək olduğunu iddia etdilər: "Əlbəttə ki, məsələ araşdırılmalı araşdırılmalıdır. Əgər bu, təxribatdırsa, bunun İran torpağında yerləşən müəyyən xarici ünsürlər tərəfindən təşkil edildiyi mümkündür. Lakin müharibənin əvvəlindən bəri İranın komandanlıq zənciri pozulub. Aydındır ki, onlar Türkiyə və Azərbaycanla Tehran da daxil olmaqla 31 bölgədəki yüksək rütbəli komandirlərə mərkəzlə məsləhətləşmədən müstəqil hərəkət etmək və mövqelərindən hücumlar etmək səlahiyyəti verdiklərini bildirən məlumatlar paylaşıblar. Buna əsaslanaraq, iki əsas ssenarimiz var: ya Türkiyəni, sonra isə Azərbaycanı bölgəyə cəlb edib müharibəni qızışdırmaq, quru əməliyyatını mümkün etmək və beləliklə, rejimi xaosa salmaq, yaxud İrandakı yerli hərbi komandanlıq zəncirləri mərkəzdən asılı olmayaraq bilərəkdən və ya bilməyərək bu cür hücumlar həyata keçirmiş ola bilər. Məncə, hər iki ssenari çox oxşardır, yəni ehtimal nisbətləri eynidir".
Politoloq Türkiyəyə atılan raketlərin bu ölkənin hava məkanından keçmədiyinə diqqət çəkib: " Bunlar ballistik raketlərdir və atmosfer xaricində fəaliyyət göstərir. Buna görə də bu raketlərin NATO qüvvələri tərəfindən vurulması mümkündür. Çünki NATO ötən gün Kürecik radarını qorumaq üçün Kürecik bazasına Patriot batareyaları yerləşdirib. Bütün bu ssenarilər daxilində Türkiyə və Azərbaycan səbirlə müharibənin bitməsini və İranın ərazi bütövlüyünün qorunub saxlanılmasını gözləyir və ümid edir. Hər iki prezidentimiz bunu dəfələrlə bildirib. Ümid edirik ki, Türkiyə və ya Azərbaycan ərazilərini birbaşa hədəf alan, ölümə və dağıntıya səbəb olacaq daha sərt, daha açıq hücum olmayacaq. Lakin bu cür təxribatların fərqində olmaq və onlara diqqətlə yanaşmaq lazımdır. Buna görə də, hər iki ölkənin silahlı qüvvələri yüksək hazırlıq vəziyyətindədir və istənilən potensial hücuma dərhal cavab vermək qabiliyyətinə malikdir. Həm Azərbaycan, həm də Türkiyə bölgədə yüksək səviyyədə hərbi hazırlığa malikdir. Hər iki ölkənin orduları istənilən ssenariyə cavab vermək qabiliyyətinə malikdir. Həm Azərbaycanın, həm də Türkiyənin bu müharibədən öyrənə biləcəyi ən vacib dərs, mümkün qədər tez bir zamanda uzaqmənzilli hava hücumundan müdafiə sistemlərinin qurulmasının zəruriliyidir. Çünki müasir müharibə hibrid müharibədir, 5-ci nəsil müharibədir. Unutmaq olmaz ki, hər iki ölkə təkcə raketlərlə deyil, həm də başqa yollarla təxribata məruz qala bilər. Başqa sözlə, təxribatlar təkcə raket atmaqla deyil, həm də Allah eləməsin, sərhəd məntəqələrinə təcavüzkar atəş açmaq və ya digər səbəblərdən də baş verə bilər. Hər iki ölkənin daxilində bombalama və ya sui-qəsd cəhdləri edilə bilər. Buna görə də hesab edirəm ki, ölkələr həmişə olduğu kimi, bir-biri ilə tam həmrəylik içində hərəkət etməli, əməkdaşlığı və qardaşlıq münasibətlərini gücləndirməlidirlər".
13:48 16.03.2026
Oxunuş sayı: 52
