XRİTDX Buxarestdə keçirilən kiberdiplomatiya sammitində iştirak edib
Rumıniyanın Buxarest şəhərində rəqəmsal texnologiyalar, süni intellekt, kibertəhlükəsizlik və kiberdiplomatiya mövzularına həsr olunmuş “Digital Innovation Summit Bucharest 2026” beynəlxalq sammiti keçirilib.
Crossmedia.az xəbər verir ki, Rumıniya Parlamentində təşkil olunan üç günlük sammit Rumıniya Deputatlar Palatasının və Rumıniya Hökumətinin dəstəyi ilə Rumıniyanın İnformatika üzrə Milli Tədqiqat və İnkişaf İnstitutu –"ICI Bucharest" tərəfindən təşkil olunub.
Tədbirdə müxtəlif ölkələrdən dövlət qurumlarının rəhbərləri, nazirlər, səfirlər, beynəlxalq təşkilatların nümayəndələri, həmçinin özəl sektordan ekspertlər iştirak ediblər.
Tədbirdə iştirak edən XRİTDX-nin Baş idarə rəisinin müavini Tural Məmmədov “Regional münaqişələrin idarə olunmasında kiberdiplomatiyanın rolu və alətləri” mövzusunda keçirilən panel müzakirəsində çıxış edib. O, çıxışında kiberməkanın müasir təhlükəsizlik mühitində strateji əhəmiyyətindən, rəqəmsal mühitdə yaranan çağırışlar fonunda kiberdiplomatiyanın rolundan və dövlətlərarası əməkdaşlığın vacibliyindən bəhs edib.
Eləcə də, XRİTDX-nin mətbuat katibi Saidə Bayramova “Deepfake" və generativ süni intellekt dövründə medianın dayanıqlığı” mövzusunda keçirilən panel müzakirədə çıxış edərək, süni intellekt texnologiyalarının inkişafı ilə əlaqədar informasiya mühitində yaranan yeni risklərdən, xüsusilə "deepfake" texnologiyaları vasitəsilə yayılan manipulyativ məzmun, fişinq hücumları və dezinformasiya halları ilə mübarizənin əhəmiyyətindən danışıb.
Sammit çərçivəsində iştirakçılar rəqəmsal transformasiya, kibertəhlükəsizlik, süni intellekt texnologiyalarının tətbiqi və informasiya mühitində dayanıqlılığın təmin olunması kimi mövzular ətrafında fikir mübadiləsi aparıblar.
Qeyd edək ki, XRİTDX ilə Rumıniyanın İnformatika üzrə Milli Tədqiqat və İnkişaf İnstitutu – ICI Bucharest arasında kibertəhlükəsizlik sahəsində əməkdaşlığın inkişafını nəzərdə tutan anlaşma memorandumu 2023-cü ildə Buxarestdə keçirilmiş Kiberdiplomatiya üzrə Beynəlxalq Konfrans çərçivəsində imzalanıb. Memorandum iki qurum arasında kibertəhlükəsizlik sahəsində təcrübə mübadiləsinin genişləndirilməsi və birgə təşəbbüslərin həyata keçirilməsini nəzərdə tutur.
12:00 13.03.2026
Oxunuş sayı: 37
