Türkiyə Yaxın Şərqdəki müharibədə vasitəçi ola bilər
Türkiyə Prezidenti Rəcəb Tayyib Ərdoğan hakim Ədalət və İnkişaf Partiyasının (AKP) iclasında deyib ki, İran və İsrail-ABŞ müharibəsi bölgəni tamamilə bürümədən dayandırılmalıdır.
Onun sözlərinə görə, regionda baş verən müharibələr səbəbindən bölgəni "qan qoxusu" alıb.
Ərdoğan vurğulayıb ki, İrana qarşı hücumlar neft qiymətinin artımına, qlobal iqtisadiyyat üçün təhlükələr yaradır:
"Bütün dünya ölkələri bundan təsirlənir. Türkiyə belə çətin məqamlarda dost və qardaş ölkələrə arxa çevirmir".
Ərdoğan qeyd edib ki, yenidən masa üzərində müzakirələr aparılması üçün səylərimizi davam etdiririk.
Məlum olduğu kimi, ABŞ və İsrail fevralın 28-də İrana qarşı hərbi əməliyyatlara başlayıb. Nəticədə İranın ali rəhbəri ayətullah Əli Xamenei və bir sıra yüksək vəzifəli şəxslər öldürülüb. Bundan sonra İran İsraillə yanaşı, ABŞ və müttəfiqlərinin hərbi bazalarının yerləşdiyi Səudiyyə Ərəbistanı, Qətər, Birləşmiş Ərəb Əmirlikləri, Oman, Bəhreyn, İraq və Kiprdə müəyyən etdiyi hədəflərə zərbələr endirməyə başlayıb.
Ərdoğanın çağırışı və regiondakı hazırkı durum barədə politoloq Əhəd Məmmədli Crossmedia.az-a danışıb: “Bu müharibə uzun müddət davam etməyəcək, ABŞ tərəfindən dayandırılacaq. Nə ABŞ, nə də İran özünü qalib elan edəcək. 12 günlük müharibə də bunu gördük".
Politoloqun fikrincə, hazırda Türkiyə vasitəçilik edə bilər: “Türkiyənin vasitəçilik təcrübəsi çoxdur. Rusiya‑Ukrayna müharibəsi zamanı bunu gördük. ABŞ–İran danışıqlarına da Türkiyə vasitəçilik edirdi və görüş də məhz Türkiyədə olmalıdır. İranın ümidsizliyindən sonra görüş keçirilməlidir. Danışıqlar heç nə ilə nəticələnmədi və indi də olan oldu. Ola bilsin ki, ikinci turda məhz vasitəçi olaraq Türkiyə iştirak etsin və danışıqlar Türkiyədə davam etsin”.
Fatimə Məmmədova
12:40 12.03.2026
Oxunuş sayı: 52
