Ukrayna cəbhədə irəliləyir: Vəziyyət dəyişir
Ukrayna Silahlı Qüvvələri cəbhə xətti boyunca operativ təşəbbüsü ələ keçirməyə və Rusiya qoşunlarının mövqelərinə qarşı irəliləməyə çalışır. Baş komandan Aleksandr Sırskinin açıqlamasına görə, Aleksandrovsk istiqamətində Desant-Hücum Qoşunlarının həyata keçirdiyi əks-hücum əməliyyatları nəticəsində bir ay ərzində 285,6 kvadrat kilometr ərazi üzərində nəzarət bərpa olunub. Ümumilikdə, əməliyyatların başlanmasından bəri Ukraynanın 400 kvadrat kilometrdən çox ərazisi işğaldan azad edilib. Digər istiqamətlərdə isə Ukrayna qüvvələri aktiv müdafiə əməliyyatları apararaq düşmənin irəliləməsinin qarşısını alır və bəzi yerlərdə irəliləməyə nail olur. Fevral ayında beynəlxalq hərbi yardımın həcmi artsa da, əsas texniki təminat Ukrayna qoşunlarının öz imkanları ilə bərpa və təmir olunan vasitələr hesabına reallaşır ki, bu göstərici yanvar ayı ilə müqayisədə təxminən 25% artıb.
Bu barədə Crossmedia.az-a danışan hərbi ekspert Ədalət Verdiyev bildirib ki, son gün ərzində Ukrayna Silahlı Qüvvələri kifayət qədər uğurlu əks-hücum əməliyyatları həyata keçirib və Dnepropetrovsk ilə Zaporojie vilayətlərinin inzibati sərhədlərinə yaxın bir neçə yaşayış məntəqəsini Rusiya işğalçılarından təmizləyiblər:
"Rəsmi məlumatlara görə, Dnepropetrovsk vilayətində bir neçə kiçik yaşayış məntəqəsi xaric olmaqla, bütün əyalətin ərazisi — təxminən 400 kvadrat kilometr — Rusiya işğalından tamamilə azad edilib; qalan 3 kiçik yaşayış məntəqəsinin təmizlənməsi üçün əks-hücum əməliyyatları davam etdirilir.
Rusiya tərəfi bu və ya digər istiqamətlərdə əks hücumlarını və hava zərbələrini gücləndirə bilər. Ukraynanın son günlərdə əsas məqsədi Xarkov və Sum vilayətlərində bir bufer zonanı formalaşdırmaq olub. Görünən odur ki, Rusiya müəyyən planlar qursa da, döyüş əməliyyatları teatrında Ukrayna kifayət qədər böyük uğurlar əldə edib. Son günlərdə hər iki tərəfdən aparılan əməliyyatların təhlili göstərir ki, Ukrayna tərəfi cəsarətlə hərbi təşəbbüsü ələ keçirməyə nail olub. Hücumların adı çəkilən istiqamətdə genişləndirilməsi və davam etdirilməsi Rusiya qoşunlarının işğal etdiyi mövqelərdən geri çəkilməsinə səbəb ola bilər. Ən azından yaxın günlərdə Ukrayna qoşunlarının daha geniş əraziləri nəzarətə götürəcəyini görmək mümkündür".
Mehriban Yariyeva
12:11 12.03.2026
Oxunuş sayı: 48
