NATO hədəf alınıbmış: Böyük savaş başlaya bilər
Son günlər Yaxın Şərqdə artan hərbi gərginlik regionda təhlükəsizlik məsələlərini yenidən gündəmə gətirib. Bu gərginliyin fonunda İran tərəfindən Türkiyə istiqamətində atıldığı bildirilən ballistik raketlə bağlı xəbərlər beynəlxalq ictimaiyyətdə ciddi narahatlıq doğurub.
Məlumatlara görə, raket Türkiyə hava məkanına daxil olduqdan sonra NATO-nun hava hücumundan müdafiə sistemləri tərəfindən zərərsizləşdirilib və hadisə nəticəsində itki qeydə alınmayıb.
Bu hadisə regionda onsuz da yüksək olan siyasi və hərbi gərginliyi daha da artıran faktor kimi qiymətləndirilir. Ekspertlərin fikrincə, belə insidentlər təkcə iki ölkə arasında deyil, eyni zamanda beynəlxalq təhlükəsizlik sistemində də ciddi suallar yaradır. Xüsusilə NATO üzvü olan Türkiyənin hava məkanına yönəlmiş raket təhlükəsi alyansın kollektiv müdafiə mexanizmlərinin də müzakirə mövzusuna çevrilməsinə səbəb olub.
Mütəxəssislər bildirirlər ki, Yaxın Şərqdə davam edən qarşıdurmalar fonunda bu kimi hadisələr regionda yeni geosiyasi risklərin formalaşmasına yol aça bilər. Buna görə də beynəlxalq təşkilatlar və dövlətlər vəziyyəti diqqətlə izləyir, tərəfləri gərginliyin daha da artmaması üçün ehtiyatlı davranmağa çağırırlar. Mövcud vəziyyət göstərir ki, regionda sabitliyin qorunması üçün diplomatik səylər və beynəlxalq əməkdaşlıq əvvəlkindən daha böyük əhəmiyyət daşıyır.
Məsələ ilə bağlı siyasi şərhçi Əziz Əlibəyli Crossmedia.az-la öz fikirlərini bölüşüb:
"Balanslaşdırılmış raketlər əvvəlcədən hesablanmış və dəqiq istiqamətləndirilmiş silahlardır. Bu baxımdan onların təsadüfi şəkildə hədəfdən kənara düşməsi ehtimalı demək olar ki, yoxdur.
Türkiyənin NATO üzvü olması faktoru isə vəziyyəti daha həssas edir və bu amilin nəzərə alınması zərurətini ortaya qoyur. Mövcud mənzərə göstərir ki, belə regional və siyasi qarşıdurma şəraitində İran raketlər vasitəsilə NATO-ya siyasi mesaj verməyə çalışır.
Hazırkı mərhələdə bu daha çox xəbərdarlıq xarakterli mesaj kimi qiymətləndirilə bilər. Lakin bununla yanaşı, İranın gələcəkdə təsir dairəsini genişləndirmək niyyətinin də olduğu istisna edilmir. Paralel olaraq aparılan hərbi taktika qarşı tərəfin cəbhələrini genişləndirməyə və onun resurslarını daha çox istiqamətlərdə bölməyə hesablanmış görünür.
Digər tərəfdən, bu strategiyanın ikinci mərhələsi uzunmüddətli müharibə taktikasına keçidlə bağlıdır. Belə bir ssenari baş verərsə, zaman keçdikcə ABŞ və İsrailin resurslarının tükənməsi ehtimalı da artır".
Elmir Heydərli
11:51 11.03.2026
Oxunuş sayı: 52
