Yaxın Şərq "qan çanağına" dönür: Körfəz ölkələri də müharibəyə qoşula bilər
ABŞ prezidenti Donald Tramp son açıqlamalarında İranla heç bir razılaşma olmayacağını və yalnız qeyd-şərtsiz kapitulyasiyanı qəbul edəcəyini bildirib. Bu mövqe regionda və beynəlxalq ictimaiyyətdə geniş müzakirələrə səbəb olub, çünki qarşılıqlı etimadın zəif olduğu bir şəraitdə hər iki tərəfin mövqeyi böyük rol oynayır. Hazırkı vəziyyətdə əsas suallar belədir: münaqişənin başa çatması üçün hansı razılıqlar əldə olunmalıdır və İran Trampın tələb etdiyi qeydsiz-şərtsiz kapitulyasiyaya razılaşa bilərmi?
Mövzu ilə bağlı siyasi şərhçi Aydın Quliyev Crossmedia.az-a açıqlama verib: "Çox təəssüf ki, İranda və Amerikada müharibənin sona çatması şərti ilə bağlı tam əks mövqelər mövcuddur. Amerika tərəfi hesab edir ki, İran qeyd-şərtsiz təslim olmalıdır. İran isə bildirir ki, Amerika hücumları bir mənalı şəkildə dayandırmalıdır və yalnız bundan sonra oturub bütün məsələlər barədə danışmaq olar.
Belə şəraitdə aydın məsələdir ki, müharibənin davamının necə olacağını və nə zaman bitəcəyini söyləmək çox çətindir. Ancaq əlbəttə, ABŞ-nin, xüsusilə Donald Trampın mövcud tələbi, yəni İranın qeyd-şərtsiz kapitulyasiya olunması – aydın şəkildə İran tərəfindən yerinə yetirilməyəcək. Çünki İranın hələ də meydanda qalan rəhbərliyinin iradəsi buna uyğun deyil. Eyni zamanda İranın müqavimət və hücum potensialı hələ tam tükənməyib. Belə şəraitdə İranın kapitulyasiyaya rahat şəkildə gələcəyini düşünmək çox çətindir. Çünki bu müharibənin həftələrlə davam edəcəyi gözlənilir.
Onun davamının necə olacağını tam dəqiqliklə təsəvvür etmək mümkün deyil. Burada yaxın gələcəkdə müxtəlif ssenariləri görmək ehtimalı yüksəkdir. Hətta mümkündür ki, Körfəz ölkələri də İrana zərbələr endirsinlər".
Müsahibimiz qeyd edib ki, körfəz Ərəb ölkələri ilə İran arasında müharibənin yeni mərhələsi və səhnəsi başlaya bilər: "Qərb ölkələrində, xüsusilə ABŞ-də müharibəyə münasibətdə ictimaiyyət arasında parçalanmalar meydana gələ bilər. Artıq ABŞ mediasının apardığı sorğular göstərir ki, amerikalıların 56%-i Trampın İran müharibəsini dəstəkləmir və onun dərhal dayandırılmasını tələb edir. Belə şəraitdə ABŞ ictimaiyyətinin təsirini nəzərə almamaq mümkün deyil. Eyni zamanda İran daxilində nə qədər daxili gərginlik olsa da, dövlət elitası parçalanmayıb və mərkəzdən qaçmaq meyilləri müşahidə olunmur. Dövlət elitası hələ birgə şəkildə fəaliyyət göstərir və etiraz hərəkatının dalğasını yaratmaq səviyyəsi hələ məhduddur. Hətta ABŞ-nin kürtləri müqavimət qüvvəsi kimi ayağa qaldırmaq planı da uğursuz görünür. Çünki İraq və İran kürtlərinin bir hissəsi heç kimin əlində alət olmaq istəmir; keçmişdə buna məruz qaldıqları üçün artıq bu barədə açıqlamalar səslənməkdədir. Belə şəraitdə İran–ABŞ–İsrail müharibəsinin yaxın vaxtlarda bitəcəyini söyləmək mümkünsüzdür".
Ayhan
11:41 09.03.2026
Oxunuş sayı: 5194
