Xocalı faciəsi bəşər tarixində baş vermiş ən ağır soyqırımı aktları ilə müqayisə olunur - RƏY
Xocalı soyqırımı öz ağlasığmaz qəddarlığı və qeyri-insani cəza üsulları ilə bəşər tarixinin ən dəhşətli faciələrindən biri kimi qiymətləndirilir. Ermənistanın Azərbaycana qarşı irəli sürdüyü ərazi iddiaları və erməni silahlı birləşmələrinin həyata keçirdiyi etnik təmizləmə siyasəti nəticəsində xalqımıza qarşı çoxsaylı qanlı cinayətlər törədilmişdir ki, onların içərisində Xocalı faciəsi xüsusi amansızlığı ilə seçilir.
Bunu Xocalı faciəsinin növbəti ildönümü ilə bağlı Ana Harayı abidəsini ziyarət zamanı Crossmedia.az-a açıqlamasında Milli Məclisin deputatı Vüqar Rəhimzadə deyib.
O bildirib ki, Xocalı soyqırımı öz ağlasığmaz qəddarlığı və qeyri-insani cəza üsulları ilə bəşər tarixinin ən dəhşətli faciələrindən biri kimi qiymətləndirilir: "Azərbaycan xalqının XX əsrdə üzləşdiyi bu dəhşətli faciə miqyasına, qəddarlığına və dinc əhaliyə qarşı yönəlmiş olması baxımından bəşər tarixində baş vermiş ən ağır soyqırımı aktları ilə müqayisə olunur. XX əsrin sonlarında törədilən bu soyqırımı yalnız Azərbaycan xalqına deyil, ümumilikdə insanlığa qarşı yönəlmiş ağır cinayət kimi dəyərləndirilir".
Parlamentari xatırladıb ki, faciə günü Xocalı şəhərini tərk etməyə məcbur olan dinc sakinlər pusquya salınaraq qətlə yetirilmiş və girov götürülmüşdür: "Amansız hücum başladıqdan sonra şəhərdə qalan təxminən 2500 nəfər azərbaycanlı, əsasən qadın və uşaqlardan ibarət əhali, təhlükəsiz əraziyə çatmaq ümidi ilə şəhəri tərk etməyə çalışmışdır. Lakin onların bir qismi yollarda qətlə yetirilmiş, bir qismi isə dağlıq ərazilərdə təqiblərdən gizlənərkən donvurma nəticəsində həyatını itirmişdir. Xocalı soyqırımı nəticəsində 613 nəfər, o cümlədən 63 uşaq, 106 qadın və 70 ahıl şəxs amansızlıqla qətlə yetirilmişdir. 8 ailə tamamilə məhv edilmiş, 56 nəfər xüsusi qəddarlıqla öldürülmüşdür. Hadisə nəticəsində 487 nəfər əlil olmuş, 1275 nəfər əsir götürülmüşdür. Onlardan 1165 nəfəri sonradan girovluqdan azad edilsə də, 150 nəfərin taleyi bu günədək naməlum olaraq qalmaqdadır".
Elmir Heydərli
13:08 26.02.2026
Oxunuş sayı: 652
