Sülh prosesi seçkilərdən sonraya qalsa... yeni seçilən namizəd sülhə necə yanaşacaq?
Beynəlxalq siyasət və təhlükəsizlik arxitekturasının ən nüfuzlu müzakirə platformalarından biri sayılan Münxen Təhlükəsizlik Konfransı bu il də qlobal və regional proseslərin fonunda xüsusi diqqət mərkəzində oldu. Dünyanın aparıcı dövlət və hökumət nümayəndələrinin iştirak etdiyi konfransda beynəlxalq təhlükəsizlik, geosiyasi gərginliklər və yeni güc balansı ilə bağlı mühüm mesajlar səsləndirildi.
Bu kontekstdə Cənubi Qafqaz regionunda formalaşan yeni siyasi reallıqlar və sülh gündəliyi ayrıca maraq doğurdu.
Konfrans çərçivəsində Azərbaycan Prezidenti İlham Əliyev tərəfindən verilən bəyanatlar, xüsusilə regionda sabitlik, təhlükəsizlik və Azərbaycan-Ermənistan münasibətlərinin perspektivləri ilə bağlı fikirlər ekspert dairələrində geniş rezonans yaratdı.
Prezidentin vurğuladığı “yeni vəziyyət” anlayışı regional dinamikanın dəyişməsi, post-münaqişə mərhələsində yaranan geosiyasi və hüquqi reallıqlar baxımından təhlil edilir.
Məlum olduğu kimi, ötən gün Almaniyanın ev sahibliyi etdiyi 61-ci Münxen Təhlükəsizlik Konfransı öz işini başa vurub. Üç gün davam edən konfransda dünyanın 60-dan çox dövlət və hökumət başçısı iştirak etmiş və qlobal xarakter daşıyan problemləri müzakirə edib, gələcək perspektivləri nəzərdən keçiriblər. Azərbaycan Respublikası Prezidenti İlham Əliyev başda olmaqla Azərbaycan nümayəndə heyəti bu il keçirilən konfransda da yüksək səviyyədə təmsil olundu. İlham Əliyevin konfransın tribunalarında verdiyi mesajlar hələ uzun müddət mütəxəssislərin diqqət mərkəzində olacaq. Çünki Cənubi Qafqaz indi dünya siyasətinin hədəf seçdiyi regiona çevrilib və Azərbaycan da bu regionun aparıcı ölkəsidir. İlham Əliyev verdiyi mesajları bir daha diqqətdən keçirməklə biz həqiqətən yeni şəraitin yaranmasının şahidi oluruq. Azərbaycan Respublikası Prezidenti bəyan edir: “Sərhədlərimizdə sülh qurulub, təmamilə yeni vəziyyət yaranıb”.
Məsələ ilə bağlı politoloq Əlimusa İbrahimov Crossmedia.az-a müsahibə verib:
- Əlimusa müəllim, Azərbaycan prezidenti İlham Əliyev bidirib ki, “Sərhədlərimizdə sülh qurulub, təmamilə yeni vəziyyət yaranıb”. Bu yeni vəziyyət nədən ibarətdir? Sülh prosesində hazırkı vəziyyət necədir?
- Bu yeni vəziyyətin nədən ibarət olduğu həm Azərbaycan, həm də Ermənistanda hamı tərəfindən təsdiq olunur: “Yeni vəziyyət həm də Azərbaycan və Ermənistan arasındakı problemləri həll etmək üçün bir daha silaha əl atmayacaqları deməkdir. Amma Ermənistanda bütün siyasi qüvvələr bu yeni şəraiti qəbul edib onun şərtləri əsasında yaşamağa hazırdırmı? Əlbəttə ki yox. Bəzi revanşist qüvvələr hələ də köhnə vasitələrdən istifadə etməyə cəhd edir. Bu məsələdə onların köhnə dəstəkçiləri də sakit dayanmır. Onları yeni münaqişə oçağı yaratmağa təşviq edir. Amma Ermənistan rəhbərliyi bu yanaşmaların qarşısını almaqda israrlı görünür. Məhz buna görə də, İlham Əliyevin bəyan etdiyi sülh üçün ciddi təhlükə yoxdur.
- Paşinyan qeyd edib ki, sülh seçkilərdən əvvəl də imzalana bilər. Bu nə qədər realdır?
- Ermənistanda seçkilərə hazırlıq hər gün daha geniş vüsət alır. Bu gün Nikol Paşinyan və onun komandası bütün qüvvələrini yayda keçiriləcək seçkilərə səfərbər ediblər. Etiraf etmək lazımdır ki, Azərbaycan və Türkiyə də bu seçkilərdə Paşinyan və onun komandasına alternativ görmür. Məhz buna görə biz də də Paşinyanın seçkilərdə qalib gəlməsini məqbul sayırlar. Bu gün Azərbaycan-Ermənistan, Türkiyə-Ermənistan münasibətlərinin inkişaf etdirilməsi də mən deyərdim ki, Paşinyanın qalib gəlməsinə istiqamətlənib. Amma Paşinyanı Azərbaycanla–Ermənistan arasında tezliklə sülh müqaviləsinin imzalana biləcəyi barədə bəyanatları vaxtından qabaq verilmiş bəyanatlardır. Çünki Azərbaycan Ermənistan konstitusiyasında məlum dəyişiklik olunmayınca müqavilənin imzalanmasına razı olmayacaq. Azərbaycan Respublikası Prezidenti bu barədə son nöqtəni Münhendəki müsahibəsi zamanı qoydu.
- Əgər sülh prosesi seçkilərdən sonraya qalsa yeni seçilən namizəd sülhə necə yanaşacaq?
- Əgər sülh prosesi seçkilərdən sonraya qalsa, yeni seçilən namizəd sülhə necə yanaşacaq sualının cavabı da mövcud siyasi reallıqlardan asılı olacaq. Hazırkı şərait göstərir ki, regionda formalaşmış yeni vəziyyət tərəfləri sülh gündəliyindən kənara çıxmağa imkan vermir və prosesin davamı məhz bu reallıqlar çərçivəsində müəyyən olunacaq.
Ayhan
11:26 17.02.2026
Oxunuş sayı: 1012
