Paşinyan seçkilərə gedir - Qərb proseslərdə hansı rolu oynayacaq?
Son zamanlar Ermənistanın xarici siyasətində nəzərəçarpacaq dəyişikliklər müşahidə olunur. Rəsmi İrəvanın Qərb strukturları ilə əlaqələri intensivləşdirməsi və ABŞ-lə siyasi yaxınlaşması regionda yeni geosiyasi suallar doğurur. Xüsusilə ABŞ vitse-prezidentinin Ermənistana səfəri və baş nazir Nikol Paşinyana açıq dəstək mesajları bu ölkənin Moskva ilə münasibətlərində məsafənin artdığına dair ehtimalları gücləndirir. Qeyd edək ki, bu proses həm Ermənistanın daxili siyasi gələcəyinə, həm də Azərbaycanla sülh gündəminə təsirsiz ötüşmür
Mövzu ilə bağlı AMEA-nın elmi işçisi Vüsalə Gülmalıyeva Crossmedia.az-a açıqlama verib.
Ekspert ABŞ vitse-prezidenti Cey Di Vensin Ermənistana səfərini ümumilikdə yüksək qiymətləndirdiyini bildirib: " Bu səfər həm diplomatik xarakter daşıyır, eyni zamanda regiona verilən siyasi mesaj kimi də qəbul edilir. Baş nazir Nikol Paşinyana açıq şəkildə nümayiş etdirilən dəstək faktiki olaraq iyun ayında keçiriləcək parlament seçkiləri ərəfəsində onun mövqeyinin gücləndirilməsi kimi qiymətləndirilə bilər. Bu dəstək Paşinyanın həm daxili auditoriyaya, həm də beynəlxalq ictimaiyyətə “sabitlik və sülh kursunun arxasında Qərb dayanır” mesajını verməsinə imkan yaradır. Avropa İttifaqının (Aİ) da Ermənistanla münasibətləri dərinləşdirməsi və islahatlara dəstək verməsi seçki öncəsi Paşinyan hakimiyyətinə əlavə siyasi dividend qazandıra bilər. Beynəlxalq legitimlik və iqtisadi əməkdaşlıq perspektivləri seçici davranışına təsir edən əsas amillərdən biri kimi çıxış edə bilər. Bu baxımdan Qərbin açıq dəstəyi Paşinyanın seçkilərdə mövqeyini möhkəmləndirən faktor kimi dəyərləndirilə bilər.
Digər tərəfdən, Moskvanın özünün də qeyd etdiyi kimi, həm Ermənistan, həm də Azərbaycan suveren dövlətlərdir və onların müxtəlif tərəfdaşlarla əməkdaşlıq etməsi normal geosiyasi proses kimi qəbul olunmalıdır. Ermənistanın Qərblə münasibətləri genişləndirməsi avtomatik olaraq Moskva ilə münasibətlərin tam qırılması anlamına gəlmir, lakin müəyyən balans dəyişikliklərinə səbəb ola bilər. Bu isə regionda ənənəvi təsir mexanizmlərinin yenidən formalaşması prosesini sürətləndirə bilər".
V.Gülmalıyeva, həmçinin sülh prossesi məsələsinə də toxunub: "Sülh prosesinə gəldikdə isə səfərin və ümumilikdə Qərb dəstəyinin müsbət təsir göstərə biləcəyi qənaəti daha əsaslı görünür. Xüsusilə nəqliyyat-kommunikasiya xətlərinin açılması və TRIPP kimi təşəbbüslər çərçivəsində əməkdaşlığın genişləndirilməsi regionda iqtisadi inteqrasiyanı gücləndirə bilər. İqtisadi əlaqələrin artması qarşılıqlı asılılığı artırır, rifah halının yaxşılaşmasına şərait yaradır və nəticə etibarilə sülh mühitini möhkəmləndirir. Bazar iqtisadiyyatı sabitlik və proqnozlaşdırıla bilən mühit tələb edir, sabitlik isə sülh şəraitində mümkündür. Bu mənada iqtisadi əməkdaşlıq sülh prosesinin praktik dayağına çevrilə bilər. Eyni zamanda bu səfər Azərbaycanın artıq regional proseslərdə etibarlı və vacib tərəfdaş kimi qəbul olunduğunu da göstərir. Vaşinqtonun regiona yanaşması əvvəlki kimi kənardan müşahidəçi mövqedən deyil, mövcud reallıqlar kontekstində qiymətləndirmə təsiri bağışlayır. Bu isə Azərbaycanın regional təşəbbüslərdə rolunun artdığını və yeni əməkdaşlıq formatlarında nəzərə alındığını göstərir.
Ümumilikdə, ABŞ və Aİ-nin Ermənistanla fəal əməkdaşlığı bir tərəfdən Paşinyanın seçki mövqeyini gücləndirə, digər tərəfdən isə regionda yeni geosiyasi balans formalaşdıra bilər. Əgər bu proses iqtisadi əməkdaşlıq və qarşılıqlı maraqlar üzərində qurularsa, Azərbaycanla sülh danışıqlarına da müsbət impuls verə bilər. Lakin proseslərin davamlı və dayanıqlı olması üçün bütün tərəflərin suverenlik prinsipinə hörmət etməsi və balanslı siyasət yürütməsi əsas şərt olaraq qalır".
Fatimə Məmmədova
10:53 13.02.2026
Oxunuş sayı: 622
