Hakimiyyəti zorla ələ keçirmək istəyənlərin SİYAHISI AÇIQLANDI
Dövlət Təhlükəsizliyi Xidməti (DTX) Azərbaycanda hakimiyyəti zorla ələ keçirmək və dövlətin konstitusiya quruluşunu zorla dəyişdirmək istəyən şəxslərin adlarını açıqlayıb.
Crossmedia.az həmin şəxslərin siyahısını təqdim edir:
Ramiz Mehdiyev – Prezident Administrasiyasının keçmiş rəhbəri. Ev dustaqlığındadır.
Abbas Abbasov – Baş nazirin sabiq birinci müavini (Rusiyada yaşayır). Barəsində qiyasi həbs qərarı çıxarılıb.
Əli Kərimli – Azərbaycan Xalq Cəbhəsi Partiyasının sədri. Həbs olunub.
Rüstəm İbrahimbəyov – Azərbaycan Kinematoqrafçılar İttifaqının keçmiş sədri, görkəmli ssenarist, kinorejissor, Xalq yazıçısı. Vəfat edib.
Fuad Qəhrəmanlı – Azərbaycan Xalq Cəbhəsi Partiyasının sədrinin müavini. Hazırda Fransada mühacirətdədir.
Qənimət Zayıdov – Jurnalist. “Azadlıq” qəzetinin baş redaktoru. Hazırda Fransada mühacirətdədir.
Məmməd İbrahim – Azərbaycan Xalq Cəbhəsi Partiyasının Rəyasət Heyətinin üzvü. Həbs olunub.
Eldar Əmirov – R.Mehdiyevin keçmiş köməkçisi. Həbs olunub.
Bundan başqa, DTX tərəfindən yayınlanmış siyahıdan məlum olur ki, proseslərin maliyyələşdirilməsi məqsədi ilə Rusiyadan Azərbaycana aşağıda adları qeyd olunmuş şəxslər pul göndərib:
Eltac Əhməd oğlu Əlisoy
Müşfiq İbrahim oğlu Qazıyev
Müşfiq Əzizalı oğlu Əsgərov
İbrahim Çərkəz oğlu Məcidov
Elməddin Əziz oğlu İsmayılov
Əli Əliağa oğlu Cavadov
Cavanşir Nusrəddin oğlu Abuşov
Mehman Cavanşir oğlu Abuşov
Qərib Mehdi oğlu Nəbiyev
Qeyd edək ki, Dövlət Təhlükəsizliyi Xidməti tərəfindən görülmüş kompleks tədbirlər nəticəsində Azərbaycan Respublikasının vətəndaşları – Mehdiyev Ramiz Ənvər oğlu, Abbasov Abbas Aydın oğlu, Kərimli Əli Əmirhüseyn oğlu və qeyrilərinin hakimiyyətin zorla ələ keçirilməsinə, dövlətin konstitusiya quruluşunun zorla dəyişdirilməsinə yönələn hərəkətlər etmələrinə əsaslı şübhələr yaranıb. Cinayət işi üzrə təqsirləndirilən şəxslərə elan edilmiş ittihama əsasən, xarici ölkənin xüsusi xidmət orqanları tərəfindən Azərbaycandakı siyasi proseslərə müdaxilə etmək məqsədilə yaradılaraq 4 iyul 2012-ci ildə xarici ölkədə “Rusiya Azərbaycan Təşkilatları İttifaqı” adı altında qeydiyyatdan keçirilmiş və “Milyarderlər İttifaqı” adlandırılan təşkilatın həmtəsisçiləri və rəhbərləri olmuş Abbasov Abbas Aydın oğlu və İbrahimbəyov Rüstəm Məmməd İbrahim oğlu, eləcə də Mehdiyev Ramiz Ənvər oğlu, Azərbaycan Xalq Cəbhəsi Partiyasının (AXCP) sədri Kərimli Əli Əmirhüseyn oğlu, partiyanın üzvləri – Qəhrəmanlı Fuad Əli oğlu, Zayıdov Qənimət Səlim oğlu və qeyriləri dövlət hakimiyyətinin zorla ələ keçirilməsi, dövlətin mövcud konstitusiya quruluşunun zorla dəyişdirilməsi barədə sövdəşdikləri məlum olub.
Sadalanan cinayət əməllərində iştiraklarına görə, Abbas Abbasov, Əli Kərimli, Fuad Qəhrəmanlı, Məmməd İbrahim və Qənimət Zayıdov Azərbaycan Respublikası Cinayət Məcəlləsinin 278.1 (hakimiyyətin zorla ələ keçirilməsinə, yaxud zorla saxlanılmasına, habelə dövlətin konstitusiya quruluşunun zorla dəyişdirilməsinə yönələn hərəkətlər), Eldar Əmirov 32.5, 278.1 (hakimiyyətin zorla ələ keçirilməsinə, yaxud zorla saxlanılmasına, habelə dövlətin konstitusiya quruluşunun zorla dəyişdirilməsinə yönələn hərəkətlərə kömək etmə), Ramiz Mehdiyev 193-1.3.2 (cinayət yolu ilə əldə edilmiş xeyli miqdarda əmlakı leqallaşdırma), 274 (dövlətə xəyanət) və 278.1-ci maddələri ilə təqsirləndirilən şəxs qismində məsuliyyətə cəlb edilib.
Abbas Abbasov, Fuad Qəhrəmanlı və Qənimət Zayıdov Azərbaycan Respublikası ərazisindən kənarda olduqları və istintaqdan gizləndikləri üçün barələrində axtarış elan edilməklə, məhkəmə tərəfindən qiyabi həbs qətimkan tədbiri seçilib.
Cinayət işi üzrə araşdırmalar davam etdirilir. (NOCOMMENT.az)
19:50 12.02.2026
Oxunuş sayı: 641
