Süni intellektlə bağlı qanun layihələri qəbul edilə bilər -Ekskuliziv
"Süni intellektlə bağlı artıq beynəlxalq məkanda hüquqi proseslər gedir. Hər bir ölkə texnoloji inkişafın yüksək səviyyəsinə çatmağa çalışır, lakin süni intellektin gətirdiyi yeni çağırışlar da mövcuddur".
Bunu Mərkəzi Elmi Kitabxanada keçirilən konfransda İnsan hüquqları komitəsinin sədri Zahid Oruc Crossmedia.az-a açıqlamasında deyib:
"İnsan axınları, etik dəyərlər, mənəvi-əxlaqi prinsiplər bu şəraitdə necə qorunmalıdır — bu məsələlər ciddi çağırışlar və yeni tələblər yaradır. Görürük ki, artıq dövlət rəhbərləri də daxil olmaqla, hakimiyyət institutlarına qarşı xarici məkanda müxtəlif xarakterli hücumlar, hibrid savaş elementləri təşkil olunur. Digər tərəfdən, fərdi olaraq insanların həyatına müdaxilələr baş verir. Deepfake artıq yeni bir fenomendir. Yəni, təkcə fake news deyil, daha dərin qatlarda insanların davranışlarını yönləndirən, onların işgüzar nüfuzuna və şəxsi həyatına müdaxilə edən proseslər qlobal reallığa çevrilib. Bu fonda süni intellektlə bağlı qanunvericilik işlərinin və təşəbbüslərinin meydana gəlməsi bir tərəfdən sevindirici haldır. Dünən parlamentdə qəbul etdiyimiz qanunlar sırasında rəqəmsal suverenliyimizə aid məsələlər də yer almışdı. Kibercinayətkarlıq sahəsində BMT-nin müvafiq konvensiyasına Azərbaycanın qoşulması üçün Milli Məclisdə müvafiq sənədin ratifikasiyasına səs verdik. Kibercinayətkarlıq artıq süni intellekt, texnologiyalar, avadanlıqlar, qurğular, modellər və alqoritmlər vasitəsilə həyata keçirilir".
Deputat həmçinin əlavə edib ki, istənilən ölkənin mental və mədəni xüsusiyyətləri modelləşdirilir, zəif nöqtələr müəyyən edilir və bu vasitə ilə dövlət və milli ideallara qarşı hücumlar təşkil olunur: "Arzulayıram ki, sosial şəbəkələr fenomeni ilə bağlı müxtəlif sahələrdə müəyyən qanunlar mövcud olduğu kimi, süni intellektlə bağlı qanunvericilik sistemində də rəqəmsal suverenliyin, eləcə də informasiya təhlükəsizliyinin ayrılmaz tərkib hissəsi kimi hüquqi təşəbbüslər və qanun layihələri qəbul edilsin. Milli müstəvidə bu çağırışlar getdikcə artır. Hesab edirəm ki, müəyyən müddətdən sonra həmin modellər tədricən bizə doğru da gələcəkdir. Bu istiqamətdə ölkəmizin müvafiq hökumət və dövlət strukturları ilə yanaşı, cəmiyyət olaraq da müxtəlif üsullar vasitəsilə birgə addımlar ata biləcəyik".
Ayhan
14:00 12.02.2026
Oxunuş sayı: 621
