Mətbuat Şurası həyəcan təbili çalır: Məsuliyyətimizi dərk etməliyik
Son illər sosial medianın cəmiyyətə təsir gücünün sürətlə artması informasiya mühitində yeni çağırışlar formalaşdırıb. Xüsusilə canlı yayımlar və geniş auditoriyaya malik platformalar vasitəsilə yayılan aqressiv, etik normalara zidd və nifrət xarakterli məzmunlar ictimai sabitliyə, milli-mənəvi dəyərlərə və ümumi informasiya təhlükəsizliyinə real təhdid yaradır.
Bu kontekstdə Mətbuat Şurasının sosial media istifadəçilərinə ünvanladığı son çağırış cəmiyyətin informasiya mədəniyyətinin qorunması baxımından xüsusi əhəmiyyət daşıyır. Qurumun mövqeyi ondan xəbər verir ki, söz və ifadə azadlığı prinsipi etik və hüquqi çərçivədən kənara çıxmadan, ictimai məsuliyyətlə həyata keçirilməlidir.
Məsələ ilə bağlı Mətbuat Şurası idarə heyətinin üzvü, Əməkdar jurnalist Azər Həsrət Crossmedia.az-la öz fikirlərini bölüşüb: "Uzun illərdir ki, bu məsələlərlə məşğul oluram. Vaxtilə rəhbərliyim altında onlayn etika seminarları təşkil etmişdik. Sosial media istifadəçilərinə məsuliyyət hissini aşılamağa çalışırdıq. Bu seminarlar respublikanın müxtəlif bölgələrində, eləcə də Bakı şəhərində, müxtəlif sosial qrupları müəllimlər, tələbələr, QHT təmsilçiləri, jurnalistlər və hətta sənətkarları – əhatə edirdi. Seminarlarla bağlı videolarımız da YouTube kanalımızda yerləşdirilmişdir. O dövrdə biz azadlıq və məsuliyyət mövzusunu gündəmə gətirməyə çalışırdıq və iştirakçılara bu həqiqəti çatdırırdıq ki, azadlıq dəyərlidir, lakin onun məsuliyyətlə istifadə olunması vacibdir.
O zaman insanlar sosial mediayla təzə-təzə tanış olur, istifadəni çox zaman düzgün qiymətləndirmirdilər. Bu da müəyyən qarışıqlıqlara, əxlaqi pozuntulara gətirib çıxarırdı. Hətta zaman keçməsinə baxmayaraq, bəzi istifadəçi qrupları hələ də əxlaqsız, tərbiyəsiz və başqalarının hisslərini nəzərə almayan paylaşımlara üstünlük verirlər.
Bunun qarşısını almaq üçün insanlara məsuliyyət hissini aşılamalı, onlara izah etməliyik ki, azadlıqlarına müdaxilə edilmir. Lakin başqalarının hüquqlarına hörmət göstərmək vacibdir. İstifadəçilər öz azadlıqlarını başqalarının azadlıqları ilə balanslaşdırmalı, hərəkətlərinin məsuliyyət çərçivəsini bilməlidirlər".
O bildirib ki, bu işdə Kütləvi İnformasiya Vasitələri və vətəndaş cəmiyyəti təmsilçiləri fəal rol oynamalıdır: "Dövlət də müəyyən vəsait və şərait yaratmaqla bu prosesi dəstəkləməlidir. Hər şey əslində həyata keçirilir, lakin yetərli deyil. Bu səbəbdən problemlər hələ də qalmaqdadır. Mətbuat Şurası da bu baxımdan həyəcan təbili çalır. Nəticədə, hamımız öz üzərimizə düşən məsuliyyəti dərk etməli, işi əlimizi daşın altına qoymaqla kökündən həll etməyə çalışmalıyıq".
Elmir Heydərli
11:32 06.02.2026
Oxunuş sayı: 481
