ABŞ–İran danışıqlarında çətinlik var: Müharibə hər an başlaya bilər
Böyük güclər arasında dialoqun bərpası və gərginliyin yumşaldılması beynəlxalq siyasətdə hər zaman strateji əhəmiyyət kəsb edib. ABŞ və İran arasında uzun illər davam edən gərginlik regional və qlobal siyasətdə ciddi narahatlıqlar doğururdu. Hazırda tərəflər arasında dialoqun başlaması ilə bağlı proseslərin irəliləməsi həm müharibə riskinin azalması, həm də diplomatik həll yollarının üstünlüyünün göstərilməsi baxımından mühüm əhəmiyyət daşıyır. Bu dialoq yalnız iki ölkə arasındakı münasibətlərin normallaşması üçün deyil, eyni zamanda bütün region üçün sabitlik və geosiyasi balansın qorunması perspektivi açır.
Mövzu ilə bağlı Crossmedia.az-a açıqlamasında politoloq Elçin Xalidbəyli bildirib ki, ABŞ ilə İran arasında dialoqun başlanması yalnız İran üçün deyil, bütövlükdə region ölkələri üçün böyük əhəmiyyət daşıyır. Onun sözlərinə görə, dialoq müharibə təhlükəsindən yayınmağın ən doğru və effektiv üsullarından biridir və mümkün hərbi qarşıdurma İranla yanaşı ona qonşu olan digər dövlətlər üçün də ciddi problemlər yarada bilərdi.
Politoloq qeyd edib ki, hazırda dialoqun başlanması və ya bu istiqamətdə hazırlıq işlərinin aparılması hərbi qarşıdurmadan yayınmaq ehtimalına ümidverici çalar qatır və sülh prosesinin irəliləməsi regional geosiyasi proseslərə də müsbət təsir göstərə bilər. Əksinə, müharibə ssenarisi geosiyasi dinamikanı hərbi faktorların təsiri altına salaraq daha təhlükəli inkişaf istiqamətlərinə gətirib çıxara bilər.
Eyni zamanda, Elçin Xalidbəyli vurğulayıb ki, dialoq mövcud problemlərin siyasi və diplomatik yollarla həllinə cəhd göstərilməsi baxımından müsbət istiqamət kimi qiymətləndirilsə də, tərəflərin mövqelərində hələ də ciddi ziddiyyətlər qalmaqdadır. Bu səbəbdən danışıqlar prosesinin uzunmüddətli xarakter daşıması, hətta müəyyən mərhələlərdə pozulması və hərbi faktorların yenidən ön plana çıxması ehtimalı da istisna edilmir.
09:42 06.02.2026
Oxunuş sayı: 527
