Deputat: Gənclər və İdman Nazirliyi yeni - yeni layihələr irəli sürməlidir
1997-ci ildən etibarən hər il fevralın ikisi Azərbaycanda gənclər günü kimi qeyd olunur.
Bu gün düz 29 il əvvəl Prezident İlham Əliyevin sərəncamı ilə təsdiq olunub.
Bu, Heydər Əliyevin gəncliyə göstərdiyi diqqət və qayğının bir nümunəsi idi. Gənclər günü MDB məkanında və Şərqi Avropa ölkələri arasında ilk dəfə olaraq Azərbaycanda qeyd olunub. 1996-cı ildən başlayaraq Azərbaycanda Gənclər günü qeyd olunandan sonra, digər MDB ölkələrində və Şərqi Avropa dövlətlərində də bu gün qeyd olunmağa başladı. Azərbaycanda hər il Gənclər günündə bütün istiqamətlər üzrə fəaliyyət göstərən gənclər yekun hesabat verirlər.
Azərbaycan gənclər bu gün bütün sahələrdə öz sözlərini deyirlər. Təhsildən idmana, texnologiyadan hərbiyə qədər...
Ölkəmizin beynəlxalq arenalarda qazandığı uğurlarda gənclərimizin mühüm rolu var. Buna ən bariz nümunə kimi İkinci Qarabağ müharibəsi nəticəsində torpaqlarımızın işğaldan azad olunmasını göstərə bilərik.
Gənclərin Azərbaycanın ictimai-siyasi həyatındakı rolu barədə Milli Məclisin deputatı Müşfiq Cəfərov Crossmedia.az-ın suallarını cavablandırıb.
- Azərbaycanda dövlətin gənclər siyasətini necə qiymətləndirirsiniz?
- Azərbaycanın bugünkü gəncləri indi özlərini müstəqil Azərbaycan dövlətinin gəncləri kimi hiss edirlər. Hər bir dövlətin əsas missiyası gələcəyini etibar edəcəyi nəsil formalaşdırmaqdır. Prezident İlham Əliyev gənclərin potensialından ölkənin mənafeyi naminə tam və düzgün istifadə olunması, dövlət idarəçiliyi sistemində iştirakının gerçəkləşdirilməsi məqsədilə bir çox sərəncam və fərmanlar qəbul edib. Həmin sərəncamlarda ölkəmizdə gənclərlə bağlı dövlət siyasətinin əsas istiqamətləri öz əksini tapmışdır.
- Bu siyasətin uğurlu alınmasının arxasında hansı məqamlar dayanır?
- Azərbaycanın dövlət siyasətinin əsas istiqamətlərindən biri də gənclər siyasətidir. Ulu öndər Heydər Əliyevin siyasi məktəbinin yetirməsi olan Azərbaycan Prezidenti İlham Əliyev bu meyarları nəzərə alaraq ölkəmizin qüdrətli dövlətə çevrilməsi naminə gənclərə böyük inam bəsləyir, ölkəmizdə onlara yüksək şərait yaradılması istiqamətində dövlət proqramları qəbul edir.
Bu gün gənclər siyasəti respublikamızda gəncliyin inkişaf yoluna işıq salıb, gənclərin dövlət idarəçiliyində, cəmiyyət həyatının bütün sahələrində iştirak edən güclü sosial təbəqəyə çevrilməsini təmin edib. Bu baxımdan, Prezident İlham Əliyevin gənclərlə iş sahəsində həyata keçirdiyi tədbirlər ulu öndər Heydər Əliyev tərəfindən müəyyən olunmuş gənclər siyasətinin uğurlu davamı kimi cəmiyyət tərəfindən təqdir edilir.
- Məlum olduğu kimi, həm təhsil, həm də idman gənclər üçün prioritetdir. Bu vəhdəti qorumaq üçün hansı addımar atılmalıdır?
- Gənclər siyasəti təkcə sosial paket deyil, eyni zamanda, ideoloji və dəyəryönümlü bir strategiyadır. Qloballaşma və informasiya mühiti yeni imkanlarla yanaşı, yeni risklər də yaradır. Buna görə gənclərin tənqidi düşünmə, media savadlılığı, doğru məlumatı seçmə və milli maraqları müdafiə etmə bacarıqları daha vacib olmalıdır.
Bu gün Azərbaycan gəncliyi qarşısında üç böyük vəzifə dayanır: bilik və peşəkarlıqla ölkənin inkişafına töhfə vermək; milli-mənəvi dəyərləri qoruyub gələcək nəsillərə ötürmək; vətəndaş məsuliyyəti və sosial həmrəyliklə cəmiyyətin güclənməsinə xidmət etmək. O cəhətdən də gənclərimiz həm təhsil, həm də idman sahəsində öz sözünü demək üçün çalışmalıdır.
- Ümumiyyətlə, sizcə, gənclər üçün təhsil və idman nə qədər əlçatımlıdır? Bölgələrdə vəziyyət necədir?
- Dövlət siyasətinin əsas prioritetlərindən biri də regionlarda gənclərin potensialının üzə çıxarılması və onların hərtərəfli inkişafının təmin olunmasıdır. Bu baxımdan Azərbaycanda gənclərin təhsili, məşğulluğu, karyera inkişafı və ictimai fəallığının dəstəklənməsi üçün dövlət tərəfindən bir sıra layihələr icra olunur. Həyata keçirilən bu məqsədyönlü proqram və təşəbbüslər gənclərin müasir çağırışlara uyğun bilik və bacarıqlarla təmin olunmasına, onların rəqabətqabiliyyətli insan kapitalı kimi formalaşmasına xidmət edir. Lakin düşünürəm ki, hələ də bu prosesin davamlılığı və nəticəyönümlüyü azdır. Fikrimcə, xüsusilə Gənclər və İdman Nazirliyi yeni - yeni layihələr irəli sürməli və real nəticələrə əsaslanmalıdır.
- Gənclər bəzən sosial şəbəkələrə həddindən çox aludə olurlar. Bu da mənfi nəticələrə səbəb olur. Siz bu barədə nə düşünürsünüz?
- Doğrudur, gənclərin sosial şəbəkələrə həddindən artıq aludə olması fiziki aktivliklə ciddi vaxt itkisi, əmək məhsuldarlığının azalması və psixoloji gərginlik kimi risklər yara bilər.
Amma hazırkı dövürdə gənclərin sosiallaşmasında ailədən və məktəbdən də daha güclü təsir imkanına malik olan məhz sosial şəbəkələr və media platformalarıdır. İndiki nəsil ən çox sosial şəbəkələrin təsirindədir. Biz sosial şəbəkələrin qarşısını almaq, qadağan etmək, ləğv etmək düşüncəsindən uzağıq. Çünki bu qloballaşmadır. Lakin biz gənc nəslə və xüsusilə uşaqlara sosial şəbəkələrdən düzgün istifadənii öyrətməliyik. Hətta müəyyən yaş kateqoriyalarına cüzi qadağalarda tətbiq edə bilərik.
Biz gənclərə dəyərlərimizi ötürmək üçün, ilk növbədə, ailənin sağlam mühitdə formalaşmasına, ailədə milli dəyərlərin qorunmasına çalışmaq istəyiriksə, davamlı olaraq bu barədə maarifləndirici tədbirlər həyata keçirməliyik.
- Yaxın gələcəkdə parlamentdə gənclərlə bağlı yeni qanun layihəsinin qəbulu gözləniləndirmi?
- Hələ konkrekt bir qanun layihəsi gözlənilmir. Amma ümumiyyətlə parlamnetin fəaliyyəti hər zaman gənc nəsili dəstəkləməyə yönəlib və bunun üçün də tez tez qanunvericilik bazası mükəmmələşdirilir.
16:56 02.02.2026
Oxunuş sayı: 550
