"Ögey ana”nın Hüseyn dayısı – Ələsgər Ələkbərovun anım günü
Bu gün Azərbaycan teatr və kino sənətinin görkəmli simalarından biri, SSRİ Xalq artisti Ələsgər Ələkbərovun xatirəsini yad edirik. O, 26 mart 1910-cu ildə Bakıda anadan olmuş, ömrünü teatr və kino sənətinə həsr etmişdir. Məktəb illərində Əbilov klubunda dram dərnəyində fəaliyyət göstərən Ələsgər Ələkbərov daha sonra Bakı Teatr Texnikumunda təhsil alaraq sənət yoluna möhkəm zəmin hazırlamışdır.
İlk peşəkar fəaliyyəti Bakı Türk İşçi Teatrı ilə bağlıdır. Burada o, bir sıra yaddaqalan obrazlar yaratmış, teatr tamaşaçılarının böyük rəğbətini qazanmışdır. Sənətkar həyatının bir dövründə məşhur aktrisa Hökümə Qurbanova ilə ailə qurmuş, Nailə adlı qız övladı dünyaya gəlmişdir. Təəssüf ki, bu evlilik bir müddət sonra şəxsi səbəblərdən dağılmışdır.
Aktyorun kino fəaliyyəti də diqqətçəkicidir. İlk dəfə 1927-ci ildə çəkildiyi “Vulkan üzərində ev” filmində Əhməd obrazını canlandırmışdır. Sonrakı illərdə isə “Almaz”, “Uzaq sahillərdə”, “Fətəli Xan”, “Ögey ana”, “Böyük dayaq” və digər filmlərdə maraqlı rollar yaratmışdır. Hər bir obraz onun sənətkarlığının dərinliyini və xarakterləri canlandırmaq bacarığını nümayiş etdirir.
1934-cü ildə Ələsgər Ələkbərov Dram Teatrına dəvət olunmuş və burada klassik və müasir əsərlərdə bir sıra əvəzsiz rollar ifa etmişdir. Xüsusilə Vaqif və Otello obrazları onun yaradıcılığının zirvəsi sayılır. Rejissor Adil İsgəndərov Ələsgər Ələkbərova “Vaqif” tamaşasında baş rol verərək həm aktyorun, həm də tamaşanın gələcəyini düzgün şəkildə formalaşdırmışdır. Bu tamaşa milli teatr səhnəsində 1064 dəfə nümayiş olunmuşdur. Hətta deyildiyi kimi, “Otello” tamaşasında Adil İsgəndərov və Ələsgər Ələkbərov arasında əvvəlcə fikir ayrılığı olsa da, nəticədə aktyor həmin rol ilə əfsanəvi şöhrət qazanmışdır.
Ələsgər Ələkbərovun teatr və kino fəaliyyətində dramatik rollar həmişə üstünlük təşkil etmiş, onun ifasında obrazlar həm emosional, həm də psixoloji dərinliyi ilə yadda qalmışdır. Kino tənqidçiləri onun rollarını klassik aktyor sənəti ilə bərabər kino texnikasının incəliklərini birləşdirən nadir nümunə kimi qiymətləndirmişlər.
Görkəmli sənətkar 31 yanvar 1963-cü ildə vəfat etmiş və Bakıdakı Fəxri xiyabanda dəfn olunmuşdur. Onun yaratdığı obrazlar və sənət irsi Azərbaycan teatr və kino tarixində əvəzsiz iz buraxmışdır. Onu xatırlamaq yalnız keçmişə hörmət deyil, həm də gənc nəsillərə sənət sevgisini aşılamaq üçün əhəmiyyətlidir.
Fatimə Məmmədova
15:10 31.01.2026
Oxunuş sayı: 541
