Qusar Xalq Teatrı – klassika ilə müasirliyin vəhdəti
Azərbaycanın bölgə teatrları içərisində xüsusi çəkisi və formalaşmış yaradıcılıq üslubu ilə seçilən Qusar Xalq Teatrı onilliklərdir rayonun mədəni-mənəvi həyatının ayrılmaz tərkib hissəsidir. Rəsmi olaraq 1992-ci ildə fəaliyyətə başlamasına baxmayaraq, teatrın kökləri XX əsrin ortalarına – ölkədə həvəskar teatr hərəkatının fəallaşdığı dövrə gedib çıxır. Həmin illərdə Qusar ziyalılarının və mədəniyyət fədailərinin təşəbbüsü ilə yaradılan teatr dərnəkləri zamanla sistemli səhnə fəaliyyətinə çevrilmiş, bu mədəni mühit bölgədə teatr düşüncəsinin formalaşmasına mühüm töhfə vermişdir.
1950–1960-cı illər Qusarda teatr sənətinə marağın yüksəliş mərhələsi kimi yadda qalmışdır. Klassik Azərbaycan dramaturgiyasına müraciət, Mirzə Fətəli Axundzadə, Cəfər Cabbarlı, Əbdürrəhim bəy Haqverdiyev kimi söz və fikir ustalarının əsərlərinin səhnəyə gətirilməsi kollektivin bədii-estetik səviyyəsini müəyyənləşdirmişdir. Əldə olunan yaradıcılıq nailiyyətləri və fəal ictimai mövqe nəticəsində teatr kollektivinə "Xalq Teatrı" statusu verilmişdir.
Qusar Xalq Teatrı öz fəaliyyəti boyunca zəngin və məzmunlu repertuarı ilə seçilmiş, səhnə əsərlərində milli-mənəvi dəyərlərin, vətənpərvərlik ideyalarının, insan talelərinin və cəmiyyətin sosial-mənəvi problemlərinin bədii təqdimatına xüsusi önəm vermişdir. Teatr kollektivi müxtəlif illərdə respublika və regional səviyyəli mədəni layihələrdə, baxış-müsabiqələrdə uğurla iştirak etmiş, sənət axtarışları ilə mədəniyyət ictimaiyyətinin diqqətini cəlb etmişdir.
Teatrın fəaliyyəti yalnız səhnə məhsulları ilə məhdudlaşmamış, eyni zamanda yeni nəslin estetik zövqünün formalaşdırılması, gənc istedadların üzə çıxarılması və onların teatr sənətinə cəlb edilməsi istiqamətində də ardıcıl iş aparılmışdır. Bu sənət ocağı bir çox aktyor və rejissor üçün yaradıcılıq məktəbi rolunu oynamışdır.
2000-ci ildən etibarən teatra rəhbərlik edən Rəhimxan Qaraxanovun fəaliyyəti kollektivin yaradıcılıq axtarışlarında yeni mərhələnin əsasını qoymuşdur. O, Azərbaycan dramaturqlarının əsərlərini ləzgi dilinə tərcümə etməklə teatrın milli və etnik mədəniyyətlərarası körpü rolunu gücləndirmiş, bir sıra tamaşalara quruluş vermiş və aktyor kimi səhnə fəaliyyəti ilə kollektivin bədii simasını zənginləşdirmişdir.
Bu dövr ərzində teatrda 55 yeni tamaşa hazırlanmışdır. Nəcəf bəy Vəzirovun "Ağa Kərim xan Ərdəbili", S. S. Axundovun "Tamahkar" (2007-ci il dövlət sifarişi), S. Rəhmanın "Yalan", İlyas Əfəndiyevin "Büllur sarayda", "Bizim qəribə taleyimiz", "Atayevlər ailəsi", Elçinin "Qatil", "Mənim ərim dəlidir", Hidayətin "Məni qınamayın", Əli Əmirlinin "Onun iki qabırğası", "Varlı qadın", Ə. Səmədlinin "İmam Şamil", M. Əlizadənin "Dağ çiçəyi", A. Məmmədovun "Həmyerlilər" və digər səhnə əsərləri teatrın yaradıcılıq salnaməsində özünəməxsus yer tutur.
2011-ci ildən bu günədək teatrın direktoru Əməkdar mədəniyyət işçisi Faiq Qardaşovdur. Teatrın quruluşçu rəssamı Marina Mahmudova, quruluşçu rejissoru isə Fəxri mədəniyyət işçisi Bağır Əhmədovdur. Onların yaradıcı əməkdaşlığı teatrın bədii-estetik xəttinin qorunub inkişaf etdirilməsində mühüm rol oynayır.
Bu gün Qusar Xalq Teatrı tarixi irsə sədaqət və müasir teatr düşüncəsinə açıqlıq prinsiplərini uzlaşdıraraq fəaliyyətini davam etdirir, bölgənin mədəni həyatına dinamizm gətirir və Azərbaycan teatr sənətinin regionlarda yaşadılmasına layiqli töhfə verir.
Teatrın son yaradıcılıq uğurlarından biri də Azərbaycan ədəbiyyatının görkəmli nümayəndəsi Vaqif Səmədoğlunun "Bəxt üzüyü" əsərinin səhnə yozumu olmuşdur. Sözügedən tamaşa ilə teatr bölgələrə qastrol səfərləri həyata keçirmiş, 27 yanvar tarixində Xaçmaz rayon Heydər Əliyev adına Mədəniyyət Mərkəzində nümayiş etdirilən tamaşa tamaşaçıların böyük marağı və rəğbəti ilə qarşılanmışdır.
14:06 28.01.2026
Oxunuş sayı: 574
