Alma almaya bənzəsə də məmur məmura bənzəmir... -Və ya sadəcə vicdan susanda
Sumqayıtda qanunsuz ticarətə qarşı keçirilən reyd zamanı Şəhər İcra Hakimiyyəti nümayəndəsinin davranışı bir neçə gündür gündəmi zəbt edən əsas məsələlərdəndir. Belə ki, həmin vəzifə sahibi küçə ticarəti ilə məşğul olan şəxsə qarşı kobur rəftar etmiş, satmaq üçün səkiyə düzdüyü almaları qanunsuz müsadirə etmişdi.
Sözügedən hadisənin kadrları sosial şəbəkədə geniş yayılmış və müzakirələrə səbəb olmuşdu: İcra hakimiyyətinin nümayəndəsi almaları səkiyə düzdüyünə görə satıcıya deyir:
- Onlar artıq sənin deyil- sanki öz malı imiş kimi...
Sonra da təxminən eyni yaşda olduğu həmin satıcının özünə daşıtdırır almaları: Yeşikləri maşına qoydurur və müsadirə edir.
Hadisənin üzərindən bir neçə gün keçib. Oxucu düşünə bilər ki, bu yazını yazmaq üçün gecikmişəm. Əslində isə gözləyirdim. Dedim, bəlkə, İcra Hakimiyyətinin nümayəndəsi bir açıqlama verər, üzr istəyər. Düşünürdüm ki, sadəcə çörək pulu qazanmaq üçün bu soyuqda çöldə meyvə satan həmvətəninə qarşı belə davranış sərgiləyən adam heç gecə rahat yata da bilməz. Vicdanı imkan verməz. Təbii, əgər vicdan varsa...
Nə əcəb həmin vəzifəli şəxsin- Sumqayıt Şəhər İcra Hakimiyyətinin İstehsal və xidmət sahələri sektorunda baş məsləhətçi kimi çalışan Samir Bədəlovun ağlına gəlmədi o satıcının uşaqları, yaşayış durumu? Bu azmış kimi hələ öz davranışını kameraya çəkdirdi də. Sanki qəhrəmanlıq edibmiş kimi. Nə əcəb düşünmədi ki, bu kadrları həmin satıcının yaxınları, qohumları da izləyəcək? Nə əcəb düşünmədi ki, bu kadrlar Azərbaycan xalqının qarşısına çıxacaq? Nə əcəb verəcəyi cavab barədə düşünmədi? Bəlkə də, düşünüb, bilmirəm. Ola bilsin, öz aləmində haqlı olduğunu və bunu "arqumentləşdirə biləcəyini" fikirləşib...
Kimsə demir ki, qanunsuz ticarətə qarşı mübarizə aparılmasın. Aparılsın. Amma bu formada yox. Necə deyərlər, hər şeyin öz qaydası var axı...İcra hakimiyyətinin nümayəmdəsi özünü Türkiyə seriallarındakı "mafya babaları" kimi aparıb.
Bəlkə də, həmin an özünə belə gəlməyib. Amma təklif edirəm ki, həmin görüntüləri özü bir də izləsin...
Ən vacibi: Lap deyək ki, Samir Bədəlov yuxarıda sadaladıqlarımın heç biri barədə düşünmədi. Bəs Prezident İlham Əliyevin tapşırıqları? Axı dövlət başçısı, demək olar, bütün çıxışlarında məmurlara öz vəzifələrindən sui-istifadə etməmək, onlara göstərilən etimadı doğrultmaq barədə tapşırıqlar verir. Ancaq, görünür, Samir Bədəlov bu məsələni də unudub.
Hər halda alma almaya bənzəsə də, insan insana, məmur da məmura bənzəmir. Hər cürü var...
Yeri gəlmişkən, üzərindən bir neçə gün keçib, görəsən, adı çəkilən məmur rahat yata bilir?
10:49 20.01.2026
Oxunuş sayı: 2386
