Ziyalılar "Azərbaycan mədəniyyəti - 2040" konsepsiyasını dəyərləndirdilər
Azərbaycan son illərdə qlobal miqyasda öz mövqeyini qətiyyətlə ifadə edən, etibarlı və nüfuzlu beynəlxalq tərəfdaşa çevrilmişdir. Bu mərhələdə isə ölkəmiz siyasi, iqtisadi, sosial məsələlərlə yanaşı mədəni irs məsələlərini ön plana çıxarır. Prezident İlham Əliyevin 14 yanvar 2026-cı ildə imzaladığı “Azərbaycan Mədəniyyəti – 2040” Azərbaycan Respublikasının Mədəniyyət Konsepsiyasının təsdiqi haqqında Sərəncam məhz bu məqsədlərə xidmət edir. Həmin konsepsiya Azərbaycan mədəniyyətinin hərtərəfli inkişafı, beynəlxalq aləmdə tanıdılması və təbliği ilə yanaşı, dövlət dilimizin saflığının qorunması, zənginləşdirilməsi və gələcək nəsillərə layiqincə ötürülməsi kimi mühüm vəzifələri də əhatə edən vahid strategiya sənədi kimi ortaya qoyulmuşdur. Bu sənəd ölkəmizin mədəni siyasətinin uzunmüddətli yol xəritəsini müəyyənləşdirərək, Azərbaycanın həm siyasi-diplomatik, həm də mədəni- sivilizasiya sahəsindəki iddiasını daha da möhkəmləndirəcək.
Crossmedia.az bu sərəncamın elm və mədəniyyət sahəsində tətbiqinin önəmi ilə bağlı Azərbaycan ziyalıları, mədəniyyət xadimləri ilə əlaqə saxlayıb:
Xalq yazıçısı Anar:
“Çox mühüm və vacib məsələlərdir. Dilimizin saflığının qorunması ilə bağlı Azərbaycan Yazıçılar Birliyində də müşavirə keçirdik. Xalq yazıçıları və alimlər müəyyən fikirlər irəli sürdülər. Dilin yad ünsürlərdən təmizlənməsini istəyərdim. Ədəbiyyata isə daha çox fikir vermək lazımdır. Çünki ədəbiyyat dilin qoruyucusudur. Prezidentin bu sərəncamı həm ədəbiyyat həm də dil məsələləri üçün vacibdir”.
Xalq yazıçısı, akademik Kamal Abdulla:
“Bu sərəncam son dərəcə ciddi dil islahatlarına və dilin inkişaf istiqamətlərinin müəyyənləşdirilməsinə yol açacaq. Ümumilikdə, ana dilimizin qorunması və inkişaf etdirilməsi bütün cəmiyyətin üzərinə düşən mühüm bir vəzifədir. Azərbaycan cəmiyyətinə bu istiqamətdə verilən çağırışlar və tövsiyələr, milli-mənəvi, xüsusilə türk dəyərlərinə sağlam və məsuliyyətli münasibətin formalaşdırılmasını önə çəkir. Mənə elə gəlir ki, Azərbaycan cəmiyyətinin fəal üzvləri dillə bağlı irəli sürülən çağırışlara real cavablar verəcək, eyni zamanda dilin hansı istiqamətlər üzrə möhkəmləndirilməsinə ehtiyac olduğu suallarına da aydınlıq gətirəcəklər. Bu istiqamətlərdən biri ədəbiyyatın inkişaf etdirilməsidir, digəri tərcümə işinin sistemli şəkildə gücləndirilməsidir və təbii ki, mühüm istiqamətlərdən biri də dərsliklərdə dil məsələlərinin daha ciddi və dolğun şəkildə əks olunmasıdır. Eyni zamanda, xarici ölkələrdə Azərbaycan dilinin tədrisi ilə bağlı məsələlərin yeni və daha yüksək müstəviyəyə qaldırılması da xüsusi əhəmiyyət daşıyır. Bütün bu məsələlərə kompleks yanaşmaq vacibdir. Cənab Prezident Azərbaycanda həyata keçirilən dil islahatlarının yalnız ölkə daxilində deyil, 50 milyonluq Azərbaycan xalqının yaşadığı bütün məkanlarda reallaşmasını gözləyir. Bu istiqamətdə isə Azərbaycan Respublikasının vətəndaşlarından çox şey gözlənilir”.
Xalq rəssamı, akademik Ömər Eldarov:
“Bu sərəncam, bu qərar bizə böyük imkanlar yaradır, yaradıcılıq fəaliyyətimiz üçün geniş perspektivlər açır, çünki fəaliyyətimizə müsbət təsir göstərir. Belə bir sərəncam bizə əhəmiyyətli dərəcədə kömək edəcək”.
Ayhan
12:59 17.01.2026
Oxunuş sayı: 2835
