Akif Aşırlı: Türk dövlətləri jurnalistlərinin birliklərini, bir-biri ilə əlaqələrini qurmaq vacibdir
Müasir dünyada informasiya yalnız xəbər daşımır, eyni zamanda millətlər arasında dialoqun, mədəni anlayışın və strateji əməkdaşlığın əsas dayaqlarından birinə çevrilmişdir. Türk dünyası ölkələrinin ortaq tarixi, mədəni və dil birliyi informasiya mühitində də yeni əməkdaşlıq formatlarının yaradılmasını tələb edir. Bu tələb yalnız mətbuat orqanlarının ciddi əməkdaşlığı ilə deyil, eyni zamanda jurnalistlər arasında peşəkar və davamlı dialoqun qurulması ilə reallaşa bilər. Belə bir əməkdaşlıq mexanizmi türk dünyasının media məkanında vahid və koordinasiyalı mövqenin formalaşdırılmasına xidmət edər, həmçinin qloballaşan informasiya mühitində dezinformasiya və yanlış məlumatların təsirini azaltmağa imkan verər.
Türk dövlətləri arasında media və informasiya sahəsində əməkdaşlığın dərinləşdirilməsi ilə bağlı müzakirələr artıq bir sıra beynəlxalq forumlarda və təşəbbüslərdə öz reallığını tapmaqdadır və bu istiqamətdə yeni platformaların yaradılması çağırışları səslənməkdədir.
Bakı Dövlət Universitetinin Jurnalistika fakültəsinin dekanı, Azərbaycan Mətbuat Şurasının sədr müavini, filologiya elmləri doktoru Vüqar Zifəroğlu də müasir jurnalistikanın qarşısındakı çağırışlara cavab olaraq türk dünyası ölkələrinin jurnalistləri üçün ortaq platformaların təşkil olunmasını dəstəkləyir və bu əməkdaşlıq zərurətini vurğulayır.
O, Türk Dövlətləri Təşkilatı çərçivəsində media sahəsində əməkdaşlığın gücləndirilməsini xüsusi qeyd edir və belə təşəbbüslərin türk dünyasında informasiya mübadiləsini genişləndirəcəyinə inandığını bildirir.
Məsələ ilə bağlı "Şərq" qəzetinin Baş redaktoru Akif Aşırlı öz münasibətini bildirib: "Bu təklif təbii ki, müsbət bir təşəbbüsdür və yaxşı nəticələr əldə etmək mümkündür. Hazırda Türk Dövlətləri Təşkilatının rəsmi ortaq media platformaları mövcuddur və fəaliyyət göstərir. Lakin problemin kökü ondadır ki, bu əlaqələr daha çox yüksək səviyyədə qurulur. Biz isə əvvəlcə aşağıdan, yəni ilkin mərhələdən başlamağı düşünməliyik.
Əvvəlcə jurnalistlərin, yəni Türk dövlətləri jurnalistlərinin birliklərini, bir-biri ilə əlaqələrini qurmaq vacibdir. Bu əlaqələr möhkəmləndikdən sonra daha effektiv və keyfiyyətli iş ortaya qoymaq mümkündür. Redaksiyalar bir-birini tanımalı, informasiya mübadiləsi aparmalı və müxtəlif media strukturlarının öz tipologiyalarına uyğun münasibətləri qurulmalıdır. Bu, işin effektivliyini təmin edəcək.
Əlbəttə, medianın müxtəlif sahələri vardır və burada xüsusi olaraq internet medianın sürətli inkişafı diqqət çəkir. Bu sahədə müəyyən işlər görmək olar, məsələn, ortaq məhsullar hazırlamaq, YouTube kanallarının fəaliyyətini koordinasiya etmək, ortaq layihələr həyata keçirmək mümkündür.
Lakin layihələrin icrası və maliyyə mexanizmləri xüsusi diqqət tələb edir. Bir sözlə, istər onlayn media, istərsə də sosial mediada bu ortaq əlaqələrin qurulması çox müsbət haldır və həyata keçirilərsə böyük fayda verə bilər".
Elmir Heydərli
14:59 22.12.2025
Oxunuş sayı: 1320
