Media və QHT

“Qara tale – ağ ölüm”: Nizami Kino Mərkəzində narkomaniyaya qarşı sərt mesaj və media məsuliyyəti müzakirə olundu

Nizami Kino Mərkəzində əməkdar jurnalist, “Obyektiv” Milli Dəyərlərin Təbliğinə Dəstək İctimai Birliyinin sədri Mübariz Əsgərovun müəllifi olduğu "Qara tale, ağ ölüm" adlı sənədli filmin nümayişi keçirilib.

Crossmedia.az xəbər verir ki, nümayişdən sonra “Həyatımızın ən qlobal problemləri mediada necə işıqlandırılmalıdır? Media qarşısında duran vəzifələr” mövzusunda Bakı Dövlət Universitetinin jurnalistika fakültəsinin müəllim və tələbələri ilə geniş müzakirə aparılıb.

Sənədli film narkomaniyanın cəmiyyət üçün yaratdığı ağır fəsadları, bu bəlanın qurbanlarının faciəli talelərini real faktlar və təsirli kadrlarla təqdim edir. Ekran əsərinin əsas məqsədi narkomaniyanın təkcə fərdi yox, bütövlükdə cəmiyyət üçün qlobal təhlükə olduğunu bir daha nümayiş etdirməkdir.

Filmdə Dövlət Sərhəd Xidməti və Dövlət Gömrük Komitəsinin narkotik vasitələrin qanunsuz dövriyyəsinə qarşı apardığı mütəşəkkil mübarizədən geniş bəhs olunur. Narkotik maddələri ən ağlagəlməz üsullarla ölkə ərazisinə keçirməyə cəhd göstərən narkotacirlərin ifşa edilməsi, onların cinayət məsuliyyətinə cəlb olunması fakt və sübutlarla göstərilir.

Çəkilişlər sərhəd-keçid məntəqələrində və həbsxanalarda aparılıb. Narkomaniya qurbanlarının etirafları və son peşmançılıqları filmin ən təsirli və həssas məqamları kimi təqdim olunur. Narkotiklərin gətirdiyi bəlanın miqyası qəhrəmanların yaşadığı faciəli talelər üzərindən açıq şəkildə göstərilir və bu kadrlar xüsusilə yeniyetmələr üçün ciddi ibrət dərsi xarakteri daşıyır.

Qeyd edək ki, 33 dəqiqəlik sənədli film Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası ilə birgə hazırlanıb.

🖨 Çap et

13:02 21.12.2025

Oxunuş sayı: 1314