Sosium

Ulu Öndər Heydər Əliyevin xatirəsinə - Azərbaycan təhsilinin formalaşmasında misilsiz xidmətlər

Güclü dövlətin təməli daşdan yox,

biliyə söykənən nəsillərin düşüncəsindən qurulur.

Ulu Öndər Heydər Əliyev

Azərbaycan təhsilinin bugünkü dayaqlarını ən çətin dövrlərdə iradəsi və uzaqgörənliyi ilə möhkəmləndirən Heydər Əliyev milli inkişafın yolunu elm və biliyin işığı ilə açmışdı. Hər il dekabr ayında ölkəmizdə böyük şəxsiyyət, müasir Azərbaycan dövlətçiliyinin memarı, ümummilli lider Heydər Əliyevin xatirəsini ehtiramla yad edilir. Tarixin nadir şəxsiyyətlərindən olan Heydər Əliyev dövlət quruculuğu ilə yanaşı, Azərbaycanın təhsil sisteminin inkişafını milli təhlükəsizlik və gələcək strategiyanın əsas dayağı kimi dəyərləndirilir. Onun hakimiyyətdə olduğu dövrlər, həm 1970–1980-ci illər, həm də müstəqillikdən sonrakı yeni mərhələ təhsil sahəsində köklü dönüşlərin baş verdiyi zaman kimi yadda qalıb.

1970–1980-ci illərin respublikasında təhsil sahəsinin maddi-texniki bazası sürətlə genişlənirdi. Həyata keçirilən dövlət proqramları çərçivəsində yüzlərlə ümumtəhsil məktəbi yenidən tikildi və ya əsaslı təmir olundu, şəhərlərlə yanaşı, ucqar rayonlarda da məktəb şəbəkəsinin genişlənməsi təmin edildi, yeni peşə məktəbləri, texnikumlar və ali təhsil müəssisələrinin filialları açıldı. Bu proses nəticəsində 1980-ci illərin əvvəlinə Azərbaycanda məktəbəqədər, orta və ali təhsil üzrə şəbəkə bütövlükdə ölkənin demoqrafik strukturuna uyğunlaşdırılmışdı. Respublikada savadlılıq göstəricisinin yüz faizə yaxınlaşması da həmin dövrdə aparılan ardıcıl işlərin nəticəsi idi.

1993-cü ildə Heydər Əliyevin yenidən siyasi rəhbərliyə qayıdışı ilə təhsil sektoru ölkənin gələcək inkişaf proqramlarının əsas bəndinə çevrildi. Çətin geopolitik və iqtisadi şəraitə baxmayaraq tam orta təhsilin mərhələli şəkildə yenilənməsi həyata keçirildi, yeni dərslik konsepsiyası tətbiq olundu, müəllim hazırlığının keyfiyyət meyarları yenidən müəyyənləşdirildi, ali təhsil müəssisələrində dünya təcrübəsinə uyğunlaşdırılmış kadr hazırlığı standartları formalaşdırıldı. Bu dövrdə ən mühüm qərarlardan biri də xaricdə təhsil alan gənclərin dəstəklənməsi və onların ölkənin gələcək elmi-pedaqoji potensialında mühüm rol almasına şərait yaradılması idi. Məhz bu xətt sonradan dövlət proqramları şəklində davam etdirildi.

Ümummilli lider Heydər Əliyevin təhsil siyasətinin mahiyyəti təkcə məktəb və universitetlərin sayının artırılmasında deyildi. O, təhsili Azərbaycan cəmiyyətinin sosial-iqtisadi inkişafının mühərriki hesab edir, bilikli və milli ruhlu gənclərin yetişdirilməsini dövlətin uzunmüddətli təhlükəsizliyi üçün əsas şərt kimi qiymətləndirirdi. Ona görə də gənclərin intellektual inkişafı, elm və təhsilin vahid sistem kimi inkişafı, milli kadrların hazırlanması həm sovet dövründə, həm də müstəqillik illərində onun siyasətinin prioritet istiqamətləri olmuşdur.

Bu gün Azərbaycan təhsilində aparılan islahatlar, beynəlxalq proqramlarda iştirak, məktəblərin yenilənməsi, müəllim əməyinin stimullaşdırılması, rəqəmsal tədris mühitinin genişlənməsi Heydər Əliyevin qoyduğu strateji xəttin müasir mərhələdə davamıdır.

Ulu öndər Heydər Əliyevin xatirəsi xalqımızın qəlbində yalnız dövlət xadimi kimi deyil, eyni zamanda təhsili millətin gələcəyi sayan böyük bir maarifpərvər kimi yaşayır.