Zəngəzur dəhlizi Türk dünyasının birləşməsində də əhəmiyyətli rola malikdir- Deputat
Zəngəzur dəhlizi yalnız Azərbaycan və digər türk dövlətləri üçün deyil, bütün region və dünya iqtisadiyyatı üçün strateji əhəmiyyət daşıyan məsələ kimi diqqət mərkəzindədir. Türk Dövlətləri Təşkilatının (TDT) Baş katibi Kubanıçbek Ömüralıyev bildirib ki, bu dəhliz qədim İpək Yolunun ən vacib istiqamətlərindən biri olaraq türk dünyasının Qərbə çıxışını təmin etməklə yanaşı, regional əməkdaşlıq və iqtisadi inteqrasiyanın da mühüm faktorudur. O, həmçinin Azərbaycan və Ermənistan liderlərinin Vaşinqtondakı razılaşmasını tarixi addım kimi qiymətləndirərək, Zəngəzur dəhlizinin bütün region, o cümlədən Avropa və Ermənistan üçün faydalı olduğunu vurğulayıb. Bununla yanaşı, TDT çərçivəsində əmək, məşğulluq və sosial müdafiə sahəsində həyata keçirilən layihələr qardaş ölkələr arasında əməkdaşlığın möhkəmlənməsinə xidmət edir və vətəndaşların müxtəlif ölkələrdə fəal iştirakını təmin edir.
Mövzu ilə bağlı Milli Məclisin deputatı Müşfiq Cəfərov Crossmedia.az-a verdiyi açıqlamasında bildirib ki, Zəngəzur dəhlizi vasitəsilə Azərbaycandan Türkiyəyə və Türkiyədən Azərbaycana, eləcə də Azərbaycan ərazisindən üçüncü bir ölkəyə yüklərin daşınması üçün yeni əlverişli imkanlar yaranacaq: "Məlumdur ki, Zəngəzur dəhlizinin reallaşması türk dünyasının quru nəqliyyatı ilə birləşməsinə də imkan yaradacaq. Bu səbəbdən Zəngəzur dəhlizi Türk dünyasının birləşməsində də əhəmiyyətli rola malikdir. Orta Dəhlizin səmərəliliyinin artması ilə Xəzər dənizində Azərbaycanla həyata keçirilə biləcək layihələr, o cümlədən Naxçıvan və Rusiya ilə nəqliyyat, enerji əməkdaşlığı sahəsində Türkiyənin regiondakı strateji mövqeyinin əhəmiyyəti artacaq. Zəngəzur dəhlizinin açılması ilə Orta Dəhlizin dəmir yolu və avtomobil yolu ilə yükdaşıma qabiliyyəti artacaq ki, bu da Şərq-Qərb ticarətinin inkişafına müsbət töhfə verəcək".
O, həmçinin vurğulayıb ki, bu dəhliz vasitəsilə Avropadan gələn mal və sərnişinlər şərq ölkələrinə çatdırılacaq: "Beləliklə, Azərbaycan yeni logistik məkan kimi dünya ticarəti və iqtisadiyyatının mərkəzinə çevriləcək. Təbii ki, Zəngəzur dəhlizinin açılması Şimal-Cənub Beynəlxalq Nəqliyyat Dəhlizi ilə yük daşımalarını da sürətləndirəcək. Azərbaycanda böyük Şərq-Qərb və Şimal-Cənub beynəlxalq dəhlizləri kəsişir. Zəngəzur dəhlizinin mövcudluğu Cənubi Qafqazda regional əməkdaşlığa və iqtisadi inkişafa transformativ təsir göstərməyə qadirdir. Bu dəhlizin açılması regionda uzun müddətdir davam edən gərginliyi potensial olaraq yumşaldaraq yeni əlaqə və əməkdaşlıq dövrünün simvolu olacaqdır. Dəhlizin inkişafı təkcə Azərbaycan və Ermənistan üçün əhəmiyyətli deyil, həm də beynəlxalq ticarət və geosiyasi uyğunlaşmalar üçün daha geniş təsirlərə malikdir".
Mehriban Yariyeva
10:59 09.12.2025
Oxunuş sayı: 1470
