Ölkə ərazisinə qaçaqmal yolu ilə gətirilmiş külli miqdarda güclü təsiredici xassəyə malik narkotik vasitə və psixotrop maddə polis əməkdaşları tərəfindən aşkarlanaraq qanunsuz dövriyyədən çıxarılıb.
Bu barədə DİN-in Mətbuat Xidmətinin Lənkəran regional qrupundan Crossmedia.az-a məlumat verilib.
Lerik Rayon Polis Şöbəsinin əməkdaşlarının çətin relyef şəraitli ərazidə keçirdikləri əməliyyat tədbirləri nəticəsində əvvəllər məhkum olunmuş 40 yaşlı Elmir Daşdəmirov, 58 yaşlı Cavanşir Əkbərov və 68 yaşlı Məhərrəm Rəhimov saxlanılıblar.
Onlardan xaricdə yaşayan narkotacir vasitəsilə əldə etdikləri 12 kiloqram narkotik vasitə və psixotrop maddə, o cümlədən 7 kiloqram heroin, 5 kiloqram metamfetamin və əlavə olaraq marixuana aşkarlanaraq götürülüb. Araşdırmalar göstərib ki, saxlanılan şəxslər narkotiklərin daşınması zamanı diqqət çəkməmək üçün guya sitrus meyvələrinin satışı ilə məşğul olduqlarının görüntüsünü yaradıb.
Faktla bağlı cinayət işi başlanıb, saxlanılan şəxslərin hər üçü barəsində həbs qətimkan tədbiri seçilib. Araşdırmalar davam etdirilir.
