Sosium

Azad Kəlbəcər artıq dirçəlir

25 Noyabr – Kəlbəcər Şəhəri Günü Azərbaycan xalqının zəngin dövlətçilik tarixi, ərazi bütövlüyünə bağlılığı və milli iradəsinin rəmzi kimi xüsusi olaraq qeyd edilən əlamətdar gündür. Kəlbəcər rayonu Azərbaycanın həm hərbi-strateji mövqeyinə, həm də təbii sərvətlərinə görə ölkənin ən mühüm bölgələrindən biri olmaqla yanaşı, çoxəsrlik mədəni irsin, tarixi abidələrin və bənzərsiz təbiət gözəlliklərinin vəhdətini özündə cəmləşdirir. İşğal dövründə Kəlbəcərin maddi-mədəni irsinə vurulan ziyan, yaşayış məntəqələrinin tamamilə dağıdılması və ekoloji fəsadlar Azərbaycanın tarixində ağır izlər buraxmışdı. Lakin Vətən müharibəsində qazanılmış parlaq Qələbə nəticəsində Kəlbəcərin azad olunması bu tarixi ədalətsizliyə son qoydu. Bu gün Kəlbəcərdə aparılan genişmiqyaslı bərpa-quruculuq işləri Azərbaycan dövlətinin gücünü, prezidentin siyasi iradəsini və xalqın yenidənqurma prosesinə olan böyük inamını nümayiş etdirir. Bölgədə müasir yol infrastrukturunun tikintisi, elektrik və kommunikasiya xətlərinin çəkilməsi, sosial obyektlərin bərpası, su və energetika layihələrinin həyata keçirilməsi, yaşayış massivlərinin layihələndirilməsi Keçid dövrünün əsas mərhələlərini təşkil edir. Kəlbəcərin təbii ehtiyatlarının – zəngin mineral suların, otlaq sahələrinin, meşə massivlərinin və faydalı qazıntı yataqlarının yenidən ölkə iqtisadiyyatına inteqrasiya olunması bölgənin strateji əhəmiyyətini daha da artırır. Kəlbəcər Şəhəri Günü həm də şəhərin tarixinin, mədəni ənənələrinin, mənəvi dəyərlərinin qorunması istiqamətində cəmiyyətin diqqətinin artırılmasına xidmət edir. Bu günün qeyd olunması yalnız bir ərazi vahidinin bərpa tarixi deyil, eyni zamanda Azərbaycan xalqının dözümlülüyünün, torpağa sədaqətinin və gələcəyə olan inamının təcəssümüdür. Qayıdış prosesinin mərhələlərlə reallaşdırılması, əhalinin təhlükəsiz, layiqli və müasir şəraitdə yaşayışının təmin olunması dövlət siyasətinin prioritet istiqamətlərindən biridir. Kəlbəcərin gələcək inkişaf konsepsiyası bölgənin turizm, kənd təsərrüfatı, sənaye və ekoloji layihələr baxımından cəlbedici mərkəzə çevrilməsini nəzərdə tutur. Bölgənin nadir təbiəti – İstisu, əsrarəngiz dağ massivləri, müalicəvi iqlim resursları və zəngin flora-faunası yaxın illərdə ölkənin ən mühüm turizm marşrutlarından birinə çevrilməsinə geniş imkanlar açır. Kəlbəcərin yenidən dirçəlişi Azərbaycanın müasir dövlətçilik modelinin praktik təcəssümü olaraq dünya miqyasında böyük maraq doğurur və ölkəmizin regional inkişaf strategiyasının nümunəvi nəticəsi kimi dəyərləndirilir. 25 Noyabr – Kəlbəcər Şəhəri Gəmzi olaraq təkcə bir günün qeyd olunması deyil, bütün Azərbaycan xalqının birlik və həmrəylik ideyasını, azad olunmuş torpaqlarımıza qayıdış iradəsini və ölkəmizin gələcək inkişafına inamını bir daha nümayiş etdirir.